APO aser Dy CM-i Rokonicha asüba mangyimer

Dimapur, Rongchii/April 18 (TYO): Lennir tajung Rokonicha Kuotsü, pa anojungi asüba osang angazüka Angami Public Organization (APO)-i mangyim tejashi lemsatepogo.
Kuotsü-i Naga nunger aser alakteta Angami nunger atema tenzükba maparen tem bilemteta, APO-i pa ama tongtibang lennir ka asüba ajanga tapok tuluka padaktsüogo ta ashi.
Pa taküm aliba mapang nübur tenzükba tsütsü Kuotsu-i wadang balala nung shilem agia tenzükba dak alia, pai 1972 -74 küm tsüngda APO nung Joint Secretary ama tenzüka liasü. Iba sülen 2013 – 2016 tsüngda Kuotsu-isa APO Advisory Board Member ka ama inyakogo.
Iba ama asükhu aser mangyim tejashi mapang ka nung, Kuotsu-i toktsür aoba kinungertem nem tesünep agutsütsü aser pa tenüla nem anisüngzük agütsütsü atema sarasademer, ta APO-isa metetdaktsü.
Maneni, Dy CM aser BJP lennir Y. Patton-i, April 17, 2019 nü Medziphema nung Rokoicha Kuotsu, Ex Minister, Nagaland asüba osang angazüka pai-a mangyim tejashi lemsatepogo.
Rokonicha ya tongmelang aser ajemaluba nisung ka shibai pa arishi taküm piyong nübur tenzüka liasü. Naga lokti ajungketsüba tsütsü pai shilem tulu agia tenzükba mapatem asenoki teti bilemtettsü. Pa anojungi asüba ajanga Naga lokti nung tapok tuluka paogo koba iba tazünglaji süngdaktsütsü atema tasak asütsü.
Maneni, BJP Nagaland tenüng nungi Patton-i, asür kinungertem den mangyim aser tejashi lemsatepogo aser iba asükhu mapang Tsüngremi parnok nem tashi agütsütsü atema sarasademer.