APO-i Angami nunger MLA tem dang TR Zeliang menungittsü mepir ; Tashiyim melii lungkak aittsü telemtetba agi

Kohima, Februry 10 (TYO): Nagaland nung Naga nunger taginüba atema Angami nunger MLA temi Chief Minister T R Zeliang pusema menungittsü mepishir, ta tanü Angami Public Organisation (APO)-i nenshia metetdaktsüogo.
Hokolbarnü APO building nung APO executive council senden amenba sülen iba temepishiba agütsü.
Nisungtem taküm samaba aser public kiojentem raksatsüsa tensa ajuruba atema süoki ia bilema APO-i Angami nunger litsü nung lungkak aitba maparenji tashiyim melii inyaktsü ta tanü sangoktsüogo.
Nagaland state nung aliba yimtenren telok ajak dang APO ya yimtenren den tesentaktep maliba telok ka lir ta metetdaktsür aser APO-i yimtenren mapa inyaktsü mejangrar aser shilema magir, ta APO executive council-isa metetdaktsü.
Parnokisa NTAC Kohima nung adentsü atema APO nungi teshimtet nübo yokba pusema nungiter ta ashi.
APO-isa kaketshirtem atema bilemja mapa inyaktsü aser tensa meraksatsü atema mepishia metetdaktsüogo. Parnokisa shisaliok rejutem ajak dang tensa angateta kaketshirtem admission agizüktsü ayongzük.