APO shisa tasen ka

Tang ama Naga nunger yimten tebilemtsü tatembang küma latettsü asoshi renemba mapang ka nung, Angami Public Organization (APO) teloki NSCN-IM telok dang India den  Naga yimten ken o latetba mapang Naga nunger yimten nüjiso jenjang dang nungi tajemba nung latettsüsa kümra tamasa ken o tatembang küma melatetdang  Naga nunger linük tenzüker telok ajak den temulung lapoka jembimatsüla ta ashiba o jagi shisa tasen ka enoktsüogo ta bilemer. Tang India sorkar o NSCN-IM telok na tsüngda August 3, 2015 nü Naga yimten ken o latettsü asoshi nükmen renema ayubaji shingaia mangu saka parnoki jembiba nung angatetba agi Naga nungertemi yongyaba  shitakba yimten nüjiso jenjangbo mangutsü. Ibaji APOi angateta lir. Aji oda, Naga yimten tebilemtsü malitsü nükjidong nung telemtetbabo agi saka Naga yimten tebilemtsübo tamajungba küma ao ta atalokra, ibajianga tamajungba asütsü asünungji, ibaji nükla dangi arua Angami nunger lenirtemi shisa tasen ka agütsüogo. Iba ama shisatsü aser tebilembaji pei tetsü taso lima aser nübortem asoshi shisabolua bilemba nungi adoker. Tang India sorkar o NSCN-IM na tsüngda Naga yimten ken o jembiba ya asayamenüba mapa ka masü. Iba yagi tarutsü Naga nunger yimten aser loktiliba tia alangdangtsü. Ibaji malangdangdang Naga nunger kin shia nungi lenirtemi shisa tajung agüja yariteptsüla. Kechi mapa nung südirsüaka tangari inyakba nung tai reprangtettsübo temela aser metongshitsütsübajia tasak masü. Ajisüaka, aiben inyaker külenbo metongshitsü tasak akümer aser mepelatep adoker. Ibaji dang masü saka tang ama yimten ken o tasak lemtettsü merangdangba mapang ka nung shisa agüja shilem agitsübaji tasak, iba jagi lokti lenir aikati ken o jembitsüba nungi ajener. Ajisüaka, yimten aser lokti nung ken o aser mapa tasak-tasak ajak paidoka endoker temela – temela shima agitsübaji masü. Aiben asenokibo yamaji inyaker. Aji oda, milen sangwaba tashih amang nung dang metetba ama, shiba dak mesüra koba kin dang kechi shisatsü, kechi kolok aser kechi tangatetba ali, ibaji yimten aser lokti tebilemtsü khuret arudang meteter. Iba mapangji tang ya lir. Aji oda, asenok daka Naga nunger lenitsü shisatsü aser tangatetba koba tashi ka ali, iba shisatsüji agütsütsüba mapangji tang lir. Tang ama mapang ya, asenok ama kinbo tangari jembiba kija angar, tajung majung memetet, junger, junger ta anidaktsüba mapang masü saka asenokiang shia tasen aser tajung agüja anitsüla. Tang ama mapang ya asenok kidang mena kazütsüba mapang masü saka shisalemsatepa jajaba mapang asütsüla. Aji oda, tang ama mapang nung ya NSCN-IM aser India sorkar na dang nenoki Naga nunger ajaki junger ta agizüktettsüsa telatetba ka bener arutsü imlar ta kija shir mejangtsüba masü. Asenok memejangdang aser amui maodang jajatsüsa len talangka anünga lir. Iba jagi asenok shisabolua bilemtsüla. Tang yabo asenoki tangari renemer bener aruba agitsü atar  amai dang atar. Iba amaisa atara, asenoki shisa tasen agüja telemtetba tajung bener arua Naga nunger nem agütsütsü melena tangari renemer bener aruba lemsadang asenok rongnungang mepetmesü timtem tulu adoktsü. Iba amajika atalokra, tangar tsüngdang asenok taaktsüka tejaka kodakang mesayu asütsü. Tangari kechi ashir ta masü asenoki kechi ashir ta asübaji tongtibang lir. Parnoki kechikoma telatetba ka bener arutsü ta masü saka Naga nunger ajak ajungtsü mechi telatetba yamai bener arudaktsüner ta asenoki ken o kabo mesüra anabo shitettsüla. India-ia aji aginer aser iba ama len sayuba shisatsü jagi kin ka timtem lendong nungi anitettsü. Atangji, shisatsü ya asenoki yanglur masü. Kin ka uluba agi mesüra nütsüng aika asüba agi shisatsü tajung ngutetter masü saka shisatsü Tsüngremi dang agütsür. Tang ya Naga nunger asoshi sen masü aser tsük a masü saka shisatsü aginer. Iba shisatsüji asenoki Naga nunger ajak asoshi Tsüngrem dang meshia len sayutsü merangdi.