Apollo 1 nung mi adoka ronger küm 50 buba nung NASA-i sayu

January 28, 2017 (Agencies): Anünglak nung mener jajatsü yangluba tayimtsü, Apollo 1 nung mi adoka iba tayimtsü nung mena alir astronaut asem rongseter küm 50 ajungba benjungmong sentong nung iba Apollo launchpad ya alima dang sayu.
NASA indang astronaut tem- Virgil “Gus” Grissom, Edward White aser Roger Chaffee nunger mena aliba Apollo 1 telung nung 1967 küm January 27 nung mokozü tesashi adokba ajanga par asemprong asü.
Par asem-i parnok shibanga aliba capsule melapokteti lia mokozü agi parnok menep aser par asemprong tango mesashiteti yangji asü. Tang Cape Canaveral Air Force Station nung iba lendong ya ataloka liasü. Iba Apollo 1 indang ‘launchpad’ nung mi adokba remseptsü asoshi teyarir arudangpo par asemprong süatoker liasü.
Par asem nem tetushi agüja, iba astronauts amenba sapang ya tangpo Kennedy Space Centre indang Visitor Complex nung agiteta bener oa yua lir.
“Iba lendong ya anünglak nung atalok asübo asenoki kechi tai ajanga adokar memeteti lila,” ta Gemini aser Apollo indang astronaut, Tom Stafford-i iba benjung sentong lapokba mapang ashi.
Iba Apollo tayimtsü nung astronaut amenba ‘capsule’ nung electrical wiring, ‘pure-oxygen environment’ aser mi jangroba osettem junga meinokba ajanga iba lendong ya adok, ta iba lendong bushisungdangeri bushitet.
Iba lendong atalokba sülen, NASA ajanga anünglak tayimtsütem nung temelenshi aika yanglushir 1968, October ita nungi anünglak tayimtsütem anüngi yoka liasü.
America nunger astronaut tem rongnungi John Glenn-i mezüngbuba anünglak nung jajaba otsü yanglu aser iba sülen Mercury 7 indang astronauts, Grissom, 40, ajanga America nunger asoshi tanabuba otsü yanglua liasü.
White ya arishi küm 36 asüba mapang, 1965 küm June ita, America nunger Gemini 4 indang pilot rongnungi mezüngbuba anünglak nung jajadanger küma liasü. Chaffee ya arishi küm 31 liasü aser pai po anünglak nung mejajadang liasü.
1986 küm January 28 nung Space Shuttle Challenger nung mapa inyakertem tepsetba aser Shuttle Columbia indang astronauts alimai tanaben meyiba arudang 2003 küm February 1 nung iba tayimtsü raksaa asübatem bilemteta, NASA ajanga iba asür bilemtetba sentong ayongzüka among.
Apollo 1 nung asür Grissom, White aser Chaffee kinungertem, parnok asüba tesemi nikongdang adenshia sentong ka agi.

You must be logged in to post a comment Login