Apollo Hospital tem nung yipten 10,000 dak tema akümtsü

Hyderabad, Oct 3 (Agencies): Apollo Hospital-i ita pezü pongu ka tsüngda nung mozüki pezü lapoksema, yiten ajak agi 10,000 dak tema akümtsü, ta Apollo Hospitals chairman C. Prathap Reddy-i Honibar nü metetdaktsüogo.

Bengaluru, Visakhapatnam, Mumbai aser Guwahati nung aliba Apollo mozüki tem nung tang yipten 9,000 aliba nung 1,000 amenoksemtsü.

Nija mozüki rongnung tulutiba, Apollo-i mozüki tasen pezü, clinic tasen aser parnoki tang tasen lapoktsü aliba Apollo Homecare asoshi sen crore 1,400 enotoktsü sentong lir.

Iba telatetba nungi sen crore 550 bo Mumbai nung aliba Apollo mozüki asoshi alitsü. Visakhapatnam Apollo mozü ki nung sen crore 170 amshitsü aser Bengaluru nung sen crore 150 amshitsü tebilemba lir.

Prathap Reddy-i ashiba agi, iba sen ya telung nung bendena ayuba nungi lir. Tia kaa onoki teti taruba aser sentsüh liro medema ayur aser kodang sen amshia terenlok mapa inyaktsüsa kümdir merendaki tenzüka inyakteter, ta ashi.

Iba terenlok tasen asoshi bendena aliba dang masü saka nüngdakra tanga lenmanga bushitsü, ta ashiba mapang pai, “Tanga linük nunga terenlok mapa inyaktsü tebilemba lir aser ibaji taruba board meeting nunga lemtettsü,” ta ashi.

Pai, India nung taruba küm 10 tashi mozükidang yipten lakh ka ka nüngdaker, ta ashi. Paisa, manemertem nüngdakba ataloktsütsü asoshi mozüki tasen lapoktsü nüngdaker, ta shisem.

Linük nung tang tashi nung Apollo mozüki tesem 40 nung amenoka lir.

Apollo Hospital tem nung joint managing director Sangita Reddy-i, tang tanga linük nung Apollo mozüki trok lir aser ano pongu Africa nung aser ka Saudi Arabia nung ta trok talila amenokdar,” ta ashi.