Apple CEO-i US, Paris Climate Deal nungi atsünginba dak sendakba nung employee dangi shidi zülu

June 5, 2017 (Agencies): Apple CEO Tim Cook-i Apple nung mapa inyakertem dangi shidi ka ajanga Paris Climate agreement nung shilem magitsü asoshi White House-i telemtetba agiba atema tezü danga bilemba lemsatep. “Climate ya atangji nung melenshidar aser iba ya raratsü asoshi asenok ajak khuret lir,” ta Cook-i zülutsü.
Tawa United States tir Donald Trump-i Paris Climate Accord nung senotsü tsütsü parnok nem khuret tali agütsüba ajanga iba nung madentsü asoshi telemtetba agiba sangdonga liasü.
Cook-i maneni ashiba agi, Trump telemtetba agi Apple company-i tzü mopung kümzüka ayutsü asoshi merangba maparen dak mekongshitsü. Apple-i tarutsü nung e-waste nokdangtsü asoshi material tasen mining asüba anentsü atema nükjidong lir.
Trump-isa ashiba agi, Paris Agreement nung US ano tanaben adentsü asoshi jembishinü tenzüktsü. Ajisüaka Trump-i global warming aitsüba aser Climate Change ya kar ajangzüktsü asoshi ashikelak maparen ka lir ta ashiba, Mayor 61 shi-i aitsüogo, ta osang ka ajanga metetdaktsü.