Apple CEO, Tim-i Bharati Airtel tekolakba den ajurutep

New Delhi, May 20 (Agencies) : Apple CEO Tim Cook-i Hokolbarnü India nung telecommunication company rongnung tulutiba, Bharti Airtel tekolakba, Sunil Mittal den office nung oa ajurutep.

4G nüngdaka akümba tsütsü jembidang, Cook-i, “4G kanga junga amenokba sülen nenoki India nung nüngdaka aliba signal tsütsü temelenshi tulu angutsü,” ta TV news channel NDTV osangbenertem dang ashi.

India nung mobile operator tulutiba Bharti Airtel aser Reliance Jio nati takümsa India rangben nung 4G lemshitsü sentong lir.

Global investment advisory, CLSA-i sangdong ka ajanga ashiba agi, India nung 3G aser 4G amshirtem ita 24 tsüngda nung asemsü agi timba, 120 million, kümogo aser ano tang nungi sen dalangba asütsüji 2018, March ita tashi nung nisung million 300 akümtsü.

Nisung million 300-i item service amshiba ajanga tajangzük noklang nung shilem 60 tashi bener arutsütsü. Tang tashi nung Pan-India 4G spectrum, 2,300 MHz ajanga inyaker company ji Bharti Airtel aser Reliance Jio na dang lir aser maongka tasenba yaa tenati anir agitsü.

“Smartphone amshir tang million 220 aliba ya 2018, March tashi nungbo 350 akümtsü imlar aser item rongnung jagi 4G amshir 210 million asütsü koba ajanga takoksa malutsü,” ta sangdong ajangsa ashi. 3G aser 4G peria lapokba ajanga network speed-a tekaraba akümtsü, ta kasa sangdong ajanga ashi.