Apple-i Hyderabad nung ‘development office’ lapokogo

Hyderabad, May 19 (Agencies): “Apple-i alima nung anguba osettem rongnung tajungtiba yanglutsü nükjidong yur inyaker aser Hyderabad, India nung office tasen lapoktetba atema kanga pelar,” ta Apple CEO Tim Cook-i ashi.
Iba office ya ajanga Apple Map tsütsü terenlok atema inyaktsü aser mapa 4,000 shi adoktsü.
“India bo tanga linük ama masü kechiba süra India-i ajak den amalitepa inyakteter. Ni Hyderabad yimti ya kanga sapua kümogo. Ni yangi aliba sobaliba terabo angazükogo aser iba tesem nung onok amenoktetba atema kanga pelar,” ta Hyderabad centre lapokba mapang Apple CEO Tim Cook-i ashi.
Iba office tasenba ya Waverock campus nung lir aser yangi ‘Maps’ telok tuluba küma renloktsü, ta company-i ashi.
iPhone yanglur, Apple-i iba mapa atema sen kwi tsüktsüar ano osang tejangja memetetdaktsü, ajisüaka ET-i, yimti tiyong nung aliba office tasenba atema Apple-i sen million dollar 25 (Rs 170 crore) shi intoktsü, ta sangdong ka ajanga metetdaktsüogo.
Cook-i, iba tesem nung sempet aketer aika dang lir aser company-i item telok aser kija tem den tesentaktep tali ulushia aotsü merangtsü, ta ashi.
Apple CEO-i Hyderbad university nung azüngertem aser tetsürtem den nikongdang ajuruteptsü sentong lir.
“Apple-i Maps terenlok tsütsü inyaktsü atema Hyderabad shimtetba atema kanga pelar. Iba ya ajanga mapa meyirjang aika adoktsü,” ta Telangana Chief Minister Kalvakuntla Chandrashekar Rao-i ashi.
Rao-i, kaketreju, kisü yimya aser lipoküm tsütsü reprangdangra Hyderabad ya India nung aliba yimti tajungtiba rongnung ka lir aser ibaji ajanga business atema tesem tajung kümdaktsür. Onoki Tim state-i aruba atema pelar. Onoki parnok iba tesem nung business tenzüka Apple aienba otsü nung state tenünga ajungkettsü imlar,” ta ashi.
Tesüiba mapanga Apple-i Bengaluru nung “design & development” kongsang ka lapoktsü atema inyakyim tenzükogo.