Apple-i sen 34,000 ‘discount’ agütsür

Kolkata, Nov. 09 (Agencies): Apple company-i parnok meyong iPhone tasentem sayar ita kata majung tsüngda nung iPhone 6S aser 6S Plus na nung ‘buyback offer’ sen 34,000 discount agütsütsü lemtetogo.

Iba ama model tejen alizükba ya Apple aser parnok den lokteper inyakertem asoshi mezüngbuba lir aser iba ya ajanga retailer tem parnok oset ayoktsü asoshi mapa tera pungba akümtsü, ta Apple India lokteper inyaker trader tejen asemi ashi.

iPhone 6S aser 6S Plus na ya taoba October ita, India nung sen 62,000 aser 92,000 agi saya. Ajisüaka imlaba dang nungi noklang nung shilem 15 nungi 20 tashi agi ajema yoktet.

Apple meyong iPhone yoktsür, Ingram Micro-i iba ‘buyback offer’ ya store tezüngtet kar aser South India nung multi-brand cellphone ayokba tesem kar atema lir.

“Company kati iba amai oset meyipa alizüka parnok meyong oset ayokba tsütsü temulung bendanga agütsüba ya tan mezüng lir. Iba ya ajanga Apple-i parnok oset India nung tang dang nungi tali yoktettsü imlar kechiba süra parnoki yamai ajema ayoktsü meimlai liasü,” ta Apple den lokteper inyaker executive tejen kati ashi.

“Tesüiba mapang iba ama offer ajanga company kati retailer tem nem subsidy sa agüja liasü aser oset tejenji yokmayonga mesüra meyokmayonga retailer khuret sa asü. Ajisüaka tanbo iba inyakyim ajak Apple company-i aniba sülen inyaker,” ta kasa nisungi ashi.

Tang buyback offer kübok aliba phone tem ya taoba hopta nungi Flipkart, Snapdeal aser Amazon.com nung shilem 7 nungi 11 tashi agi jenjang ajemer teyokdak lir.

Snapdeal tatong Tir, Rahul Taneja-i, “Offer kar benokba ajanga iphone tasen karbo kanga kara yokteter. Onok dang iPhone 6S ya yimti tulu nungi dang masü saka yimti tila tem nungia mangar,” ta ashi.

Apple nung chief executive officer Tim Cook-i, “India nung mapang agia iba business junga akümtsü tamang akar,” ta ashi.