Apple iPhone Slow Down asüba dak sendakba nung South Korea nung bushisüngdang tenzükogo

Aenjeti 22, 2018 (Agencies): iPhone models tejentem slowdown asüba dak sendakba nung nüburtemi Apple puri asaa phone tasen alidaktsütsü mechi nung iba ya inyaker, ta temulung melemi bilemba ken o South Korea nung Prosecutors temi bushisüngdang tenzükogo. Seoul Central District Prosecutors’ Office nungi sangdong ka ajanga ashiba agi, parnok iba ken o ya intellectual property dak sendakba nung obendangba unit nem agütsüogo, ta Yonhap news agency ajanga metetdaktsü. Seoul nung amendaker aliba civic group, Citizens United for Consumer Sovereignty (CUCS) puri Apple CEO Tim Cook aser Apple Korea tekolakba Daniel Dicicco anema ken o ka benokba sülen anogo ka lir iba ken o asadangtsü tenzükogo.
CUCS puri ashiba agi, software update sütsüba ajanga iPhones tejentem asaa slowdown südaktsüba ya model tasentem ayoktsüba mechi nung lir. Parnoki ashiba agi, US nunger smartphone yangluba company ya fraud, property damage aser obstruction of business by digital devices dak sendakba nung aitsütsüla. Maneni parnoki compensation suit ka Apple aser local headquarters anema taoba hopta file süogo. Iba nung parnoki nisung shia nem won million 2.2 ($2,057) agütsütsü asoshi akhang.
Apple puri taoba küm Luchii (December) 20 nü parnok indang operating software updates asüba ajanga iPhone 6, 6S aser iPhone SE slowndown südaktsü, ta nangzükogo.Iba update ya smartphone aoksa shut down asütsüba nungi kümzüktsüba atema lir. Maneni parnoki Luchii 28 nü iba inyakyim ya parnok ajangzüktsü asoshi inyakba masü, ta shiogo.