Apple, lemon aser prune juice ajemba ajanga tebok anükdaktsür

Hopta nung asenok kodang asemben dang nungi tajemba scü kozüdir idangji asen tepok nung scü akanger (constipation) aser timtem agütsür. Mapang shitak nung asen tepok maoba ajanga digestive tract nung scü tejok tem takangba akümer aser iba timtem ajanga asenok animesüngzüktetter.
Iba ama timtem mangutsü atema asen achi ajemba yimyatem melensia constipation paidoktsü asoshi lenmang balala lir.
Over-the-counter (OTC) laxatives ajemba ajanga mapang tatsüka atemabo taneptsü agütsür ama asütsü saka laxative mozü tali ajemba ajanga temang shilem kar nung timtem talisa dehydration ama adokdaktsütsü akok.
Constipation timtem angudang taneptsü angutsü atema asenok aikati kara kara laxative mozü balala alia jemteper saka bushisüngdangertemi ashiba agi, iba ama timtem mapang juice tapu balala ajemba ajanga kar nembo taneptsü agütsütsü akok. Süngolemba aser süngjanglijang agi yangluba juice nung dietary fiber aser sorbitol densema lir aser anaprong yagi tepok anük anüka odaktsür.
Juice tem nung tzü jenti densema lir koba ajanga scü takang anükdaktsür aser kasa mapang temang nung tzü peria yutsür.
Tzü aser temang nung teyari agütsüba juice peria ajemba ajanga tepok nung scü akangba dang masü saka timtem balala nungi taneptsü agütsür.
Tsünglanglen agüja aliba süngjanglijang nung fiber, sorbitol aser tzü densema lir koba constipation atema teyari tulu agütsür:
1. Prune juice
Prunes mesüra plum takong ta asüba süngjang nung dietary fiber jenti lir. Iba süngjang ya temang atema laxative ama teyari agütsür.
2014 küm bushisüngdangba ajanga angazükba agi, anogo nung prunes gram 100 achiba ajanga tepok anükdaktsür. Prunes nung sorbitol, magnesium aser potassium keta lir aser iba juice ya laxative ama teyari agütsür.
2. Lemon juice
Vitamin C keta aliba lemon süngjang nung antioxidant compound densema lir. Ibaji ajanga tepok telung nung tzü peria yutsür aser scü anükdaktsür.
Tepok nung tzü peria maliba ajanga-a constipation agi kangshidaktsütsü akok. Iba ama mapang lemon aser tzü meyoktepa juice yanglur ajemba ajanga constipation nungi taneptsü agütsür.
3. Apple juice
Apple süngjang achiba ajanga tepok anükdaktsür, kechiyong apple nung dietary fiber aser sorbitol densema lir.
U.S. Department of Agriculture osang ajanga ashiba agi, apple süngjang ka nung fibre g 4.4 aser sugar g 18.91 keta lir. Tanga nutrient dak alaka apple nung vitamin C, calcium aser vitamin A peria lir koba ajanga tepok nung timtem agientsür.
Iba den külemi, apple nung pectin keta lir. Pectin ya water-soluble fiber tapu ka aser ibaji ajanga tepok nung janatem indoktsü asoshi teyari tulu agütsür.
(Source : Internet)