‘Appointment Order’ taila agütsüba ken o nung nisung 9 apu

Kohima, March 30 (TYO): Kohima kübok Paramedical nung alir Naga nunger ka constable mapa taila nung shimokba atema March 23, 2016 nü Special Branch (PHQ) Kohima ketdangser kati South P.S Kohima nung FIR ka benokba nung ajemdaker Kohima Police-i Dimapur nung telidak nisung ka tenüng agi, Medemyanger (35 yrs) apu, iba sülen Noklomeren Imsong (37 yrs) aser tangartem apu, ta Sub-Divisional Police Officer & PRO Kohima, Atu Zumvü, NPS-i sangdong ka nung metetdaktsü.
Noklomeren Imsong apuba sülen police-i pa dang asüngdangya asüdang telangzüba agütsüba nung ajemdaker iba maparen nung shilem agir ta tai tongloktsür, Yimlei Phom (30 yrs), C. Tiakaba, Kilamzaile (28 yrs), Zachano @Abeni Ngullie (35 yrs), Achila Kapfo (46 yrs), Aosenla Chang(32 yrs)(tai tonglokja alirtem rongnung tongti) aser Longpochang Ao (28 yrs) nungertem apu, ta sangdong nungsa shia lir.
Police-i bushisüngdangba mapang, mapa nung shimokba ketdangser indang sign taila amshia sen lakh 2,8000 atema appointment order taila ka agütsü aser senji parnok lemsaa agi, ta bushitetogo.
Iba dak alia, iba ken o nung tai tonglokja alir tongti, Aosenla Chang den külemi parnoki Nagaland Police nung constable mapa agütsütsü ta shia candidate tem dang nungi sen lakh aika meshia agiba inyakyim bushitetogo, ta Kohima Police sangdong nungsa shia lir.
Tai tonglokja alir tongti, Aosenla Chang’er ki aser tangar kitem mita aodang mapa atema application aika den appointment order taila ana aser S.P (Int) Kohima indang official seal densema tazüngba kulikakettem aika ngutetogo, ta sangdong nungsa metetdaktsü.
Iba dak sentakba nung taila yangluba, süpokrem agiba aser ozüng alema tasa tamajung atongba onük balala nung Kohima South P.S. nung ken o ka benokogo.