April 1 nungi yi yangluba units nem license magütsütsü: Nitish Kumar

Munger (Bihar), January 18 (Agencies): Bihar nung yi meshimeshia nokdangtsü nükjidong nung tanü Chief Minister, Nitish Kumar-i taruba financial year nungibo yi manufacturing unit shinga nem-a license magütsütsü, ta metetdaktsü.
Tanü Munger nung sentong ka nung jembidang Nitish Kumar-i, “Financial year 2017-18 nungibo tang aliba units indang license renew mesütsütsü aser taküm April mezüngnü nungi state nung yi yangluba unit nem license tasen magütsütsü,” ta metetdaktsü.
Iba telemtetba ya Excise Act, 2016 ozüngtem den peta yangluogo, ta pai shisem.
Yashi Rajgir nung state cabinet senden amendang Kumar-i, taruba financial year nungibo beer manufacturing units aser parnok indang bottling plants den ENA (Extra Neutral Alcohol) manufacturing units indang license renew mesütsütsü lemteta liasü.
Kasa senden nung beer manufacturing units 3, bottling plants 12 aser ENA 6 atema license renew mesütsütsü lemtet.
Item telemtetba ajanga kongshia shibangtsüpur rongnung Patna dictrict kübok United Spirits Limited, aser state tesem balala nung United Breweries Limited, Carlsberg India Limited aser Molson Coors Cobra India Ltd densema lir.
Ajisüaka Ethanol yangluba units trokbo menokdangtsü, kechiyong ibaji petrol den meyokteptsü atema amshir, ta Kumar-isa ashi.
Tanü Chief minister, Kumar Jamui nungi Munger-i indangindanga aotsü liasü, ajisüaka pai Bhimbandh anasa aliba arem nung ajungbena anener ayong tila ka nung tzü chigo, iba sülen pai, iba tesemji raliwalirtemi semdangba tesem ka asütsü asoshi ajungkettsütsü, ta sangdong.