April 15 nü 44th AR den Exhibition football asayatsü

Mokokchung, April 9 (TYO) : April 15, 2017 nikongdang 44th Assam Rifles Ground, Mokokchung nung football match balaka angutsü aser iba asayaji teti meteta aliba tejak tejen kar den Mokokchung nung aliba 44th Assam Rifles na tsüngda asayatsü.
Iba asaya ya 44th Assam Rifles temi ‘civic action programme’ kübok shilem ka amai ayongerba lir aser iba den külemi ‘Sentinels with the sons of the soil’ omen kübok tesem nung aliba nüburtem den metetpelatsü nükjidong nung asayatsü.
Mokokchung football team tenüngji ‘Mokokchung Young Hearts United’ alitsü aser iba telok nung nisung ajak agi parnok 30 shi lir. Parnok ajak ya mapa balala inyakertem lir. Iba telok nung administrator tem, nüburtem asoshi inyakertem, tesayurtem, Arogo aser lokti lenirtem, shishilembartem aser lanurtem dena lir.
Parnok rongnungji tesüiba mapang Chief Secretary Alemtemshi Jamir, Captain aser beauty queen, Imlibenla Wati nata densema lir. Iba den külemi football asayar tejena kar dena lir.
Assam Rifles team nungi captain ji commandant Col KS Kataria alitsü. 44th AR-i asaya ayongba mongka agia Mokokchung Young Hearts United (MYHU – Mi-Who ta adokba olung)-i Mokokchung ajungtsü asoshi inyaker lokti balala dang iba sentong tajung indang lemsatepogo. Parnoki NGO tem Ao Senden, Watsu Mungdang, AKM aser MTLT teloktem dang iba sentong nung arua adentsü jaokba ama parnoki pelashishia agizükogo.
Iba exhibition asaya ya minute 90 asayatsü aser iba asayaji mongin referee temi acha ayangtsü.
Iba sentong tobur ajungtsü asoshi ajaki meteta aliba kentener Nise Meruno ‘Celebrity Guest’ asütsü aser asayamenür Hopong Naga-ia shilem agitsü.
April 15, 2017 nikongdang 2:00 ako nungi iba sentong nübur ajaki arua reprangtsü MYHU-i pelashishisa jaoker.