April 21 nü Tuli & Tzüdikong tzümetsüng agi kongshir nem teyari agütsür

Tuli, May 08 (TYO): April 21, 2016 nü Tuli aser Tzüdikong nung tzümetsüng agi kongshir kibong 272 atema NSDMA ajanga teyari (immediate relief) yokba sen DDMA ketdangseri Tuli ADC, Sentiwabang Aier nem agütsüogo.
Tanü iba teyari agütsüba sentong tongmelang ka Tuli ADC kidang agi. Iba sentong nung NSDMA aser District Disaster Management Authority (DDMA) nungi ketdangsertem, Tuli All Ward Union, Tzüdikong Adhoc Vice Chairman aser district administration-tem densema liasü.
DDMA ketdangser T.Wangshi Jamir ajanga NSDMA nungi aruba teyariji Tuli ADC Sentiwabang Aier nem amoktsüogo.
Iba teyari ya yakta agütsütsü liasü saka May 1, 2016 nü yipru tulu arua yimtsüng aika nung teraksa lendong ajuruba ajanga tera menutsüsa kümadok, ta DDMA ketdangseri metetdaktsü.
Tuli ADC-ia mapang tatsüka agia jembidang, NSDMA aser DDMA ketdangsertemi lendong ajuruba mapang nungi tanü tashi maparen ajak nung yaritepba asoshi pelaba lemsatep.
Paisa nüburtem dang kümdanga alitsü olen ka ashidang, “lendong teimba ka nisungtem mekümdangba ajanga adoker, anungji, kisüjensü maparen balala yangludang kanga kümdangtsüla,” ta metetdaktsü.
Iba tzü-metsüng lendong agi kongshia alirtemi metettsüba kaji; iba teyari ya May 10 (Mongulbarnü) nungi Tuli ADC office nungi alem tenzüktsü.
“Mapang shitak nung teyari agütsüba asoshi kanga pelar” ta nübur tenüng nung Tzüdikong Adhoc Vice Chairman, O Benjong aser Tuli All Ward Union, Chairman Aküm Imsong nati pelaba metetdaktsü.
“Mapang shitak nung teyari (immediate relief) agütsüba mapa yabo Tuli aser Tzüdikong nung ibai mezüngbuba lir”, ta Aküm Imsong-i ashi.
May 2, 2016 nü NSDMA Secretary, Khrienuo Metha den par department nungi ketdangsertemi Tuli nung April 21 nü tzü-metsüng atalokba tesem aser May 1 nü yipru ajanga teraksa bener arbutsüba yimtsüngtem tsüngdong oa semdanga liasü.