April 21 nü UNTABA-i Tzüdikong nung senden ayonger

Dimapur, April 16 (TYO): United Naga Tribes Association on Border Areas (UNTABA)-i akhidang nungi Naga nunger sobaliba aser Assam den arrtsü telemtetba tajung ka dangi arutsü atema mera aika benoker achaayanga inyaka arudar, ta UNTABA sangdong ka ajanga metetdaktsü.
Item nükjidong ataloktsü atema Tuli Area Joint Council Forum (TAJCF)-i ketdangsüa Hokolbarnü, April 21, 2017 nü Consultative Public Meeting ka Community Hall, Tzüdikong nung amentsü ayongzükogo, koba ajanga Nagaland sorkar matsüngdang benoka inyaktsü atema nüburtem tangatetba asadanga telemtetba agitsü aser ibaji mapang tetemsü nung tanga teloktem den benoka jembitsü.
Iba senden nung jembitsü tongtibang onüktem rongnung- Naga nunger sobaliba aser Assam den arrtsü latettsü atema inyakyim aser iba onük dak sentakba nung stakeholders ajak den angatettepa onüktem nung ajemdaker telemtetba agitsü.
Anungji UNTABA-i Nagaland nung arrtsülen aliba constituency ajak nungi nüburtemi shimba züngsemtem (MLA tem), arrtsü district tem nungi Civil aser Police ketdangsertem, arrtsülen aliba Magistrates, Naga Tribes Hohos nungi züngsemtem, Nagaland nung tongti tentettem nungi, arrtsülen aliba tesemtem nungi Village Council züngsemtem den GBs, UNTABA nungi Advisory Board, Executive Committee aser Action Committee züngsemtem ajak iba senden nung medema arua adentsü mepishia metetdaktsür, ta sangdong nungsa shia lir.