April 25 nü nungi Parliament senden tenzüktsü

New Delhi, April 08 (Agencies): Taruba Lok Sabha aser Rajya Sabha senden April 25 nü nungi tenzütsü aser May 13 nü tashi amentsü akok, ta sorkar sangdong ka ajanga tanü metetdaktsü.
“Tertrokbuba Lok Sabha 8buba senden April 25 nungi tenzüktsü. Sorkar rongtak nüngdak aika lir, anungji senden May 13 tashi akatsü akok,” ta Lok Sabha sangdong ka ajanga ashi.
Ano Rajya Sabha nungi osang ka ajanga, “Züngsemtem dang 239buba Rajya Sabha senden Hombar, April 25, 2016 nungi tenzüktsü metetdaktsür,” ta ashi.
Yimtenren tensa anokshiba sülen Centre-i yimsüsüba state, Uttarakhand nung April mezüngnü nungi sen teintokba tashi agütsütsü atema sorkari ozüng ka benoktsü asoshi Lok Sabha senden agitsü mapang atsülanga liasü.
Tir yimsüsüba kübok aliba Uttarakhand nung April mezüngnnü nungi sen teintokba tashi Centre-i agütsüba sülen Tir-i Uttarakhand Appropriation (Vote on Account) Ordinance, 2016 Tir-i sangdongogo.
Parliamentary Affairs Minister, M Venkaiah Naidu-i, Uttrakhand nung yimtenren tensa anokshiba ajanga Parliament senden atsülang, ta metetdakja liasü.
Tan senden nung GST Bill densema tongtibang bill tem opposition party temi nungita agizüktsü sorkari imladar.