New Delhi, February 09 (Agencies): Jon Snow tanaben shia arua maneni shilem agitsü asü? Mesüra pai ‘Game of Thrones’ nung shilem agitsüren tembangadokar iba osang metettsü asoshi India nung alirtemi mapang talangka meyongyadaktsütsü sentong renema lir.
English channel Star World Premiere-i par television sentong nung medieval fantasy Television sentong, ‘Game of Thrones’ season 6 India nunga taküm April ita nungi tenzüka sayutsü renema lir.
HBO teloki yangluba television series ya US nung tembanga sayuba sülen India nunga sayutsü renemer lir.
Kibong balalai chuba menden asoshi toktepba otsü ya Star telok kübok densemba Star World aser Star World HD natia par television sentong nung sayutsü renemba osang jangjaogo.
Tan February ita 15 nü nungi tenzüka iba otsü indang season 1-5 India nung sayutsü renema lir.
Nüngutu kaket zülur, George R.R. Martin-i züluba otsü kakettem nung ajemdaker yangluba ‘Game of Thrones’ television series-i 2015 Emmy Awards 12 tashi agizükogo.
“Star World aser Star World Premiere na nung ‘Game of Thrones’ sayuba ajanga iba otsü sapurtem dang masü, tan asensüa reprangertema puadakja tsüratemdaktsütsü imlar,” ta Star India otongdar kati metetdaktsü.
Tesüsa sayuba ‘Game of Thrones’ season 5 nung iba otsü nung tongti shilem agir, Jon Snow rüjep nung tasü ama laoa sayur.
Iba sülen British actor, Kit Harington-i shilem agisang, Jon Snow-ji asü asü mesüra yiru iba osang metettsü asoshi ‘Game of Thrones’ saburtemi kanga dang yongyaseta atadar.

You must be logged in to post a comment Login