April ita nungi tenzüka Jio amshir asoshi sentong tasen: Mukesh Ambani

New Delhi, February 21 (Agencies): Anogo 170 nung Reliance Jio amshir million 100 jungogo, ta Reliance mendenbuba, Mukesh Ambani-i tanü metetdaktsü.
“Second ka nung Jio amshir nisung 7 akümer,” ta pai video conference ka ajanga tanü sangdong.
April ita nungi tenzüka Jio amshirtem-i India telongzük nung aliba network ajunga den angati jembitettsü, ta paisa metetdaktsü.
“Jio amshirtemi Jio network nung ita ka nung data GB crore 100 agir aser aji anogo ka nung data GB crore 3.3 lir. Aser India nung aliba tanga network ajunga indang 4G station dang nungi Jio indang ya anaben agi tali lir ,” ta Ambani-i ashi.
Reliance Jio Infocomm Ltd-i phone nung angati jembitsü aser data jenjang temela agi amshitettsü asoshi sentong sayaba ajanga India nung aliba nüburtem aser telecom company tem aoksadaktsü, aser iba sentong ya March ita tatem tashi amshitettsü lir.
April ita nungi tenzüka Jio amshir ya tang ama alitsü malitsü, ibaji kanga shisadanger, aser aikati Jio SIM ya angati amshitsü maongka aliba ajanga amshir lir, ta jembir.
Jio ajanga iba sentong ya küm ka agi monur ang tenzük. Iba sentong asoshi Reliance Industries ajanga sen billion $20 inoka lir.
Reliance Jio amshirtem asoshi 2017 küm April ita nungi tenzüka sendong tasen melentsü aliba osang ka Reliance India Limited nung mendenbuba, Mukesh Ambani ajanga Mongulbarnü metetdaktsü.
Tang Jio SIM amshia alirtem asoshi Jio ‘Prime Membership’ sentong ka, Ambani-i metetdaktsü.
April ita ka nungi tenzüka voice call aser roaming, akhi ama angati asütsü. Costumertemi sen 99 agütsüba ajanga tenüng züluoktsü aser tang anguba sentong kasa ya 2018 küm March ita tashi amshitettsü. Iba ‘Prime Membership’ March 1 nungi 31 tashi nung züluoktsü.
Iba sülen costumer temi ita ka atema sen 303 agütsütsü aser iba sen agütsüba ajanga tang aliba ‘Happy New Year Offer’ kasa ya ita 12 asoshi amshitettsü.
Ajisüaka costumertemi ‘Prime Membership’ nung medenaka, voice call angati asütsü aser roaming nung taa malitsü.
Jio amshirtem asoshi April 1 nungi tenzüka data asoshi sen agütsütsü, saka tanga network nung timba aoba plan den medemdanga yanglur angutsü, ta metetdaktsü.