APSC Assistant Examination Controller puogo

Guwahati, November 12 (Agencies): Assam Public Service Commission (APSC) nung ochimashi maparen maneni kakteta tanü Guwahati nung police-i APSC nung Assistant Examination Controller, Pabitra Koibatra puogo aser APSC mendenbuba, Rakesh Paul kinüngtsü tenüng nung aliba ki ka nungi sen den oset kar sota yuogo.
Koibatra par kidang apuba sülen police station-i anir oa pa dang asüngdangyadar, ta police osang ka ajanga ashi.
Ano külen police-i Rakesh Paul kinüngtsü tenüng nung aliba ki ka nungi APSC answer script 11, marks tabulation scripts 9, sen lakh 10, laptop ka aser mobile phones asem pua bener ogo.
November 4, 2016 nü APSC tongti apuba sülen commission nung züngsem, Samedur Rahman-a jenshia senzüa lia November 9 nü Guwahati anasa Rangia nung apu.
Police-i pua alisang Dibrugarh Town Planning engineer, Naba Kanta Patir o nung ajemdaker Rahman indang nija security officer, Mabud Ali Choudhury apu, aser pa o nungsa ajemdaker sen yong mapa agütsüba ochimashi ken o nung Rahman tenünga züngok.
Patir-i tetsür tepo doctor ka dang süpokrem lakh 10 melen APSC ajanga mapa agütsütsü ta nangzük, aser la o nung ajemdaker Patir October 27 nü apu.
November 9 nü Assam sorkar Cabinet senden ka amendang APSC tongti, Rakesh Kumar Paul mapa nungi anentsütsü atema state Angh dang mepishitsü lemteta liasü.
November 7 nü CID züngsemtemi APSC headquarters office nung answer script rizüngba takdang densema takdang asem shibangtsüogo.
Police-isa, Paul adianu tebushitak lir. Paul’er adianu indang printing press nung taila answer scripts menünga sen yong APSC tatidang agütsür nem agüja telangzüba tasen zülushir, ta tai tonglokja lir.
Assam Civil Service (ACS), Assam Police Service (APS), Education Service, allied services aser gazetted menden ajak sen aika yong ayoker ta tai tonglokja lir.