APSC bushisüngdangtsü atema SST tentet

Guwahati (Assam), November 08 (Agencies): Assam Public Service Commission (APSC) Chairman, Rakesh Kumar Paul-i anir ochimashiba ken o tang bushisüngdangdar, aser iba bushisüngdangba ketdangsütsü atema Assam state sorkari Special Supervisory Team (SST) ka tentetogo.
Iba ken o ya kanga tebenja ta angateta state sorkari züngsem asemi akümba SST tentettsü atema lemtet, ta ketdangser kati osabgnertem dang metetdaktsü.
“Yasüng sorkari Additional Director General of Police (CID), Anil Kumar Jha mendenbuba ser SST ka tentetogo. Iba tentet nung züngsem anaji police ketdangsertem lir,” ta ketdangserisa ashi.
SST nung züngsem anaji- Inspector General of Police (CID) Surendra Kumar aser Inspector General of Police (SB), R P Meena nai lir, ta paisa shisem.
Iba ken o ya tang Dibrugarh district police-i bushisüngdangdar.
“Iba ya ken o kanga tebenja ka lir aser ken o tulu asübayong iba ochimashi ken nung ano nisung aika densema alitsü südi. Anungji sorkari police tongti ketdangser ka kübok iba bushisüngdang ketdangsütsü atema SST tentettsü lemtet,” ta pai ashi.
Honibarnü police-i anogo 14 atema Paul meshiba sülen tang state yimtiba nung bushisüngdangdar.
Ano iba bushisüngdang nung densema alir kati, Public service balala nung mapa agütsüba atema süpokrem agiogo ta Paul-i tai menangzüker, ta ashi.
Yasüng police-i Guwahati nung aliba Zoo Road nung ki ka mita oa liasü aser iba dak sentakba nung ketdangser kati, “Onoki kiojen indang kulikakettem aser tanga kulitem bushiogo. Iba kiji Paul tenüng nung mali. Onoki item kulikaketji reprangshidar,” ta metetdaktsü.
ADGP (CID), Anil Kumar Jha-i, “Sorkar tetuyuba kübok SST-i bushisüngdangbaji ketdangsüa reprangdar. Tangtangbo iba dak sentaba nung ni kecha jembitsü makok,” ta ashi.