APSC ochimashi ken o nung DTO ka puogo

Guwahati/Tezpur, Rongchii 10 (Agencies): Assam Public Service Commission (APSC) ochi mashi ken o nung police-i Sonitpur district transport officer Prasenjit Kumar Ghosh tezpur nungi puogo.
Sonitpur additional superintendent of police Numal Mahatta-i ashiba agi, pa ya Dibrugarh police station nung ken o benoka aliba dak ajemdaker apu.
Pa apuba sülen Ghosh ya Guwahati-i anir aru aser Kahilipara nung special branch headquarters nung shibanga ayu.
Ketdangser sangdong ka janga ashiba agi, forensic examination agiba sülen APSC office nungi police temi pa indang answer scripts pezü apuba ya taila ta ngutet aser invigilator signature dena aia aliba ngutetba sülen pa apu.
Ghosh ya APSC pur indang combined competitive exam, 2014 nung tatidang agütsü aser 2016 küm mapa nung aniok.
Pa Sonitpur-i taoba ita transfer masüba tsüngda Kamrup (metro) district, district transport officer ama inyaka liasü.
Pa apuba dena iba ken o nung Assam civil service (ACS), Assam police service (APS) aser allied services officers parnok 36 jungogo.
Osang ka ajanga ashiba agi, Rakesh Kumar Paul APSC mendenbuba asüba mapang nung Ghosh mapa angu, kechiyong pa Paul’er kinunger lir.
Ajisüaka Ghosh-i iba osang ya aitsüogo.
Mapa melena sübokrem agütsüba ya Paul inyakba mapang nung atalok aser pa iba ken o nung pua lir. Ghosh ya nagmati belenshiba ochimashi ken o nung sendaka lir, ta aitsüba sülen Guwahati nungi transfer yok.
Dispur BJP legislator Atul Bora-i chief minister Sarbananda Sonowal dangi tata garitem nung nagmati talila belenshiba nung sen aika meshizüka agiba nung Ghosh densema lir, ta shidi ka züluja liasü.
Maneni pa dang CID puri nagmati belenshiba ochimashi ken o dak sendakba nung ken o ashishiogo.
Police den sendaka aliba osang ka ajanga ashiba agi, APSC ochimashi ken o nung ano nisung aika aputsü, kechiyong forensic tests agiba ajanga aibelenertem aika putetogo.