Apusoba mapang laor asü ?

Bihar assembly general election nung JDU aser RJD nati aniba teloki takok anguba agi India nung BJP anemer yimten teloktem temulung ulua kümogo. Aji oda, Bihar nung BJP anemer teloktemi takok anguba takokji Bihar atema dang masü mesüra Nitish Kumar o Lalu Prasad na atema dang masü saka India ajunga nung BJP anemertem telok asoshi anguba takok ka asütsü. Iba jagiang Assam nungi dena Congress sorkar nung Chief minister, Tarun Gogoi-i Bihar nunger nem tenüngsang agütsüogo. Linük nung tang state general election agitsü anendaka aliba state-tem rongnung Assam ya ka lir. Aji oda, Assam nung Congress MLA aika Tarun Gogoi toktsür  BJP nung adenba mapang tang Bihar nung BJP teloki tamakok angubaji pa atema takok tuluka angu amai asütsü. Atangji, Bihar election nung JDU aser RJD nati aniba teloki takok anguba kuliji parnoki nübortem meima inyakba agia asütsü akok saka aikati center nung BJP teloki nübortem rongnung telemsa adoktsüsa yimsü asüba agi JDU aser RJD teloktem tajangzük angur ta bilemer. Tetezü, Nitish o Lalu nati anguba takokji tena ajungba kija agi masü saka BJP lenisüba majungba agi angu ta angatetter. Küm ka jakdang India nung BJP teloki yimsü asütsüsa maongka ngutetbaji India asoshi anü tasen tajung ka adoker amai liasü. Nübortemi BJP dak nungi imlabaji tulu liasü. Iba jagi BJP telok ya Hindu yimsü dang keta asenba RSS teloki aniaka, tanga tamangba yimsü amanger Muslim aser Khristan purtem dena BJP nung sadoksadoka dena liasü. Ajisüaka, taoba küm ka tsüngda nung BJP teloki India yanglushitsü merangba mapatem agi linük nung, talisa, Muslim aser Khristan-tem mulung animesüngzüktettsüsa kümdaktsüogo. Aji oda, India nung Hindu nunger masüba nübortembo India senso masü ama mezüngmeshia amshira India tipmatemtsü aser iba ama inyaktsü merangba sorkarji arrmashitsü. India ya Hindu nunger kija agi akümba linük ka masü, anungji Hindu nunger kijai India ya tashi itta menokdaktsütettsü. Tanü tashi India tashi itta nokdaka aliba tashiji India nung alir kin kidong aser tamangba yimsü ajak kasasa akümtsübua amshir aser senso shia nem pei amangnüba tamangba yimsü amangtsü temeten agüja lir. Iba jagi India tashi itta alitsü asoshi Mahatma Gandhii ashiba ama, Hindu nunger shiai  Hindu nunger tajung ka ama litettsüla, Muslim nunger shiai Muslim nunger tajung ka ama litettsüla aser Khristan  shiai Khristan tajung ka ama litettsüla. Ajisüaka, tanübo BJP teloki tenük amur inyakba mapa kaji chiyongtsü tashi nung yimten tashi amshitsü tenzükba ya asütsü. Nüjiso anguba tashitemetetter lima ka nung yimteni an shi dang chiang, nashi shibo techi ta nübortem azüoktsü merangra, iba jagi tanü asüngbo yimten yimsüsürtem maksü dang ajurutsü. Atangji, tang Bihar election yabo state general election dang asünungji center sorkar nungbo kecha timtem malitsü ta bilema alitsüa akok. Ajisüaka, kodang state nung BJP teloki mekoklir, iba jagi center sorkar nung Rajya sabha nungi timtem tulu adoktsü, kechiyong Rajya sabha nung tatartem yabo state nung MLA-temi shimtettsü. Tanga center nung yimsü mesütetaka, state tulu aser tongtibang aika nung BJP anemer yimten teloktemi yimsü asür asünungji Rajya sabha nung tatartemji BJP anemer teimba lir. Anungji, Congress teloki yimsü asüba mapang BJP teloki tatar senden tipdema melidaktsüi ayimtena anema apusoba ama, tang Congress teloki tatar senden nung o lemtep junga magidaktsüi timtem agütsüba asenoki angur. Aji oda, linük asoshi inyaktsü telemtetba tongtibangtembo tatar senden anaprongla Lok sabha aser Rajya sabha nung tatartem teimbai mesüra asemsü nung anasüi mulung nung dang telemtetba agitettsü asünungji, linük asoshi inyaknüyonga telemtetba magitet kangshitsü aser idangji sorkar laotsüsa akümtsü. Aji oda, tang küm ka tsüngda nung nübortemi BJP agi laktet nungbo BJP asoshi tapusodang lao amai asütsü. Atangji, Bihar tamakok ya BJP teloki tarutsü asoshi tansütsü aser temoatsü ama angateta amshira, shibai metet BJP teloki taruba election nungbo junga inyaktettsüa akok. Nagaland nungbo shinga kecha yimten tangatetba mali, ‘Ruling’ nung dena senzür dang asünungji, Bihar nung BJP teloki tamakok angubaji ngur BJP nung adentsü bilema alirtem toa tebilemba melenshir RJD mesüra JDU nungang dennüa alitsüa akok !