AR Commandant police ket nung ananü ayutsü

Aizawl, May 09 (Agencies) : Assam Rifles temi lenmang nung gari anendaktsür hon bener aoba mapa nung tongti shilem agisang Assam Rifles, 39th battalion nung Commandant Col Jasjit Singh, state nung okadak kati tanü nungi tenzüka anogo ananü atema police ket nung ayutsü temelaba agütsüogo.
Police-i Jasjit Singh ya parnok ket nung pongunü atema ayutsü atema Chief Judicial Magistrate court nem temepishiba ka agüja liasü.
Singh atema okatsüri kenü atema asüngdang ajisüaka court-i ananü atema police nem agütsü.
December 14, 2015 nü hon shibelener ket nungi hon rakzüker aoba ken o dak sentakba nung Singh ya May 5, 2016 nü Aizawl district court kima Special Investigation Team (SIT)-i apu.
CJM court-i pa police ket nung asemnü ayutsü asoshi agütsü aser yangji bushisüngdangertemi maneni asüngdangyadar.
April 21, 2016 nü C Lalnunfela-i Kulikawn Police Station, Aizawl nung FIR ka benokba nung, Aizawl tezülen Assam Rifles telok ka prangpong peria amer pa lenmang tom nung puita pa mena aliba SUV gari indang gear box nung miima bena aliba sen crore 14.5 alang, hon long 52 agizüka bener ao, ta shia lir.
Iba dak sentakba nung tesüiba mapang kaketshir lenir ka den ajaki metet aliba shishilemba mapa inyaker ka dena parnok nisung pongu mezüng apu aser iba sülen Assam Rifles ti (8) pusem.