AR-i Khehoi nung NSCN (K) züngsem ka apu

Dimapur, June 18 (TYO) : 37 Assam Rifles aser 32 Assam Rifles nungi telok kati June 15, 2016 nü Dimapur kübok Khehoi village nung NSCN (K) Private Nikato Kiba apu.
Nikato indang osang ya April 2016 nung lazüker liasü aser iba sülen 37 Assam Rifles nungi telok balakati ita ana jungnüa pa mita aru, ta Assam Rifles sangdong ka nung metetdaktsü.
Pa Khehoi Village nung lir ta osang tejangja ka angazükba sülen June 15, 2016 nü sepaitemi pa apu aser pa ket nungi Point 22 Pistol ka, injangtem aser taitsü aketba kulikakettem bena lia apu, ta AR sangdong nungsa shia lir.
Pa dang asüngdangya asüdang pa NSCN (K) nung züngsem ka aser service Number ji 12204 ta nangzük. January 2016 nung pa NSCN (K) nung aden aser iba sülen Ponyu Camp (Myanmar)-i ao. Idakji Basic Military Training agiba sülen pa Dimapur-i aru aser tashiyim agi sen sarutsü aser ozüng alema mapa inyaktsü mapa lemzükja liasü, ta AR sangdong nungsa shia lir.
NSCN (K)-i March 2015 nung India sorkar den Ceasefire tenangzüktep agien aser tang iba telok ya ozüngi noktanga lir. 2015 nungi iba teloki ozüng alema mapa aika inyakogo.