AR-i NSCN züngsemtem anema inyaker

Dimapur, May 27 (TYO): Assam Rifles-i India aser Naga nunger tsüngda tesentaktep raksatsütsü meranga, kuli kecha makai NSCN dak tenük yoka mapa inyaker ta MIP-i metetdaktsü.
May 24, 2019 ayaterm nung AR-i Dimapur kübok Doyapur nung NSCN züngsem asem ki mita ao. Parnoki mezüng Union Territory (UT) nung Leacy Samuel Lotha’er mit aser idangji pa kinungtsü o tanurtem dang liasü. Idak nung jagi parnoki ‘country made pistol’ ka ngutet, ta MIP-i ashi.
Iba sülen AR sepaitemi Colonel Vikato Sumi’er ki mita ao aser idakji ki anüker Chingrin dang liasü. Ki mita reprangdang prangpong-injang kar ngutet, Tatemsa, AR-i UT staff, Hekuto Aye’er ki mita ao aser idangji house tax dak sendakba MTRs kar den pistol teraksa ka ngutet, ta parnokisa shisem.
Ki mita aoba sülen AR sepaitemi Mrs. Kheliho (w/o Samuel), Chingrin (caretaker of Col. Vikato’s house) aser Hekuto Aye nungertem apu aser Dimapur nung police ket nung agütsü. NSCN züngsemtem dak tenük yoka mapa inyakdang AR-i tai maket kinungertem pua timtemdaktsüba ya magizüker.
Indian Army (AR)-i Nagalim kübok Hevuto Battalion (Mokokchung), Jadonang Brigade (Tamenglong), Phungtha Brigade (Ukhrul) aser Jalukie-Hebron route/area nung tim masüba mapa inyaker. Ajisüaka, Indo-Naga yimjung olemtep meraksatsü atema onoki yimjung nung linür saka AR-i iba ama mapa inyakba ajanga timtem bentsür arutsü,
Indo-Naga yimjung olemtep aser ceasefire tangatettep ya ajaki akhümtsübutsüla saka AR-i iba tangatetba nungi pila aoba ajanga Indo-Naga ceasefire ya tenüng atema dang lir ama sayur, ta MIP-isa metetdaktsü.