AR-i NSCN (IM) sepai ka apu

Kohima, July 17 (TYO) : Kohima town nung July 15 nü tashiyim agi sen sarurtem mita aoba mapang Assam Rifles-i NSCN (IM) Military Wing nung inyaker sepai ka tenüng agi Sergeant Major Kevilezo Dzuma apu. Pa ya arishi küm 33 Tsiepama nunger liasü.
Telong nung alir kar senzüba osang angazükba sülen, Assam Rifles purtemi item tesemtemji mittsü tenzük aser tesüsa nikongdang 6:30 ako shi nung Network Counter, BOC, Kohima nung paji apu ta Assam Rifles ojanga metetdaktsü.
Pa pur asüngdang dang pai paji NSCN (IM) – ‘Military Wing’ nung 2008 küm nungi inyaker aser tang Lt Col John Tangkhul, Kohima Town Commander aser Dy Kilonser Jinituo, CO Kohima District kübok inyaker ta metetdaktsü.
“Lt Col John Tangkhul aser Dy Kilonser Jinituo nati ashiba  dang Kevilezo-i inyaker aser shitakba nungbo July mezüng hopta nung BOC Area, Kohima nung saru saruseper alitsüla saka mesarutetba ajanga par tanishir ana jagi paji merenshia liasü, ” ta Assam Rifles purtemi  asüngdangya dang metetdaktsü.
Pa apuba anogo nung dokan trok nungibo saru meshir liasü ta AR purtemisa ashi.