AR-i NSCN(IM) Detention Centre nungi nisung ka kümzük Tashiyim agi sen saruba atema NSCN (R) züngsem ka apu

Dimapur, October 9 (TYO) : Tashiyim agi sen saruba, nisung apuba aser prangpong-injang den mozütem shibelenba osang angazükba sülen Company Commander, 32 Assam Rifles-i anir sepai telok kati Half Nagarjan colony, Dimapur nung ki ka mita ao, ta AR-i Hokolbarnü sangdong ka nung metetdaktsü.
Assam Rifles sepaitemi ki mita reprangdang, iba kiji ozüngi memelaba NSCN (IM) indang Detention Center liasü aser Rovisalvo Angami ta ser nisung ka pur yua aliba angu. Pa ya NSCN (IM)-i Operation Acceleration Dimapur Town kübok apuba liasü, ta AR sangdong nungsa shia lir.
Sepaitemi asüngdangya asüdang angazükba agi, NSCN (IM) züngsemtemi pa apu aser kanga mejungi züker ventilation maliba taktang ka nung puoka yua liasü. Iba ki nung NSCN (IM) züngsem trok apu.
NSCN (IM) züngsem trokji, Sgt Major Trihah, Sgt Major Yetovi, Sgt Major Aketo, Cpl Lamek Rongmei, Cpl Among aser Vikhuho nungertem ta jangjaogo. Iba kidang nungi taitsü aketba kulikaket aika ngutetogo, ta AR-isa metetdaktsü.
Assam Rifles-i Rovisalvo Angami kümzükba inyakyim ajanga NSCN (IM)-i ceasefire tensa nung ozüngi memelaba mapa inyakba jungkai adoka sayur. September 17, 2014 anogo nunga kasa ozüngi memelaba NSCN(IM) indang Detention Camp ka 29 AR/6 Sect AR-i iba tesem nungsa makdok, ta Assam Rifles sangdong nungsa shia lir.
Ano, October 15, 2015 nü 37 Assam Rifles-i 32 Assam Rifles den külemi telungpur mita aodang NSCN (R) züngsem ka apu.
Dimapur jila kübok Church Road tesem nung NSCN (R) züngsem ka prangpong bener tashiyim agi sen sarua senzür ta osang angazükba sülen sepaitem iba tesem jagi ao.
Sepaitem aruba lazüker tashiyim agi sen sarusangji jena aotsü merang saka pa talangka jena maodang apu. Iba nisungji Toka Sema ta jangjaogo aser pa ket nungi 7.65 mm Pistol ka den magazine ana den round 10 aser sen 2,220 ngutetogo aser pa den külemi tangubaajak police ket nung agütsüogo, ta AR sangdong nungsa shia lir.