AR-i osangkakettem nem metetdaktsüba ken o agiener

Dimapur, Jan.23 (TYO) :  Yaküm küm Nagaland nung Assam Rifles purtemi osangkakettem nung NSCN-K purtem osang madoktsüla ta yimozülurtem nem metetdaktsüba ken o ka parnokisa meyipa agiogo, ta Press Council of India (PCI) ajanga metetdaktsüogo.
Assam Rifles purtemi Nagaland nung adokba osangkakettem nung telungpur telok kobasa center sorkari ‘ban’ süja lir, iba telok indang osang kecha madoktsüla, ta metetdaktsüba anema yimozülurtemi PCI dang iba ken o reprangtsü asoshi shia liasü.
Ano, yaküm kümsa “National Press Day” amongba anogo November 16 nü osangkaket kar nungbo tejashi sayua yimobilem tapak tazüng tokja liasü.
Iba talalokba osang angashia PCI-i AR aser yimozülurtem aser Nagaland sorkar dena Gauhati nung jaoka jembia liasü. Iba senden nung sepaitemi yimozülurtem aser state sorkar nungi nüngdakba purtem jaoka tajungba ka jembir tangatettep ka dangi arutsü nungloktsü. Anungji, January 14 nü Dimapur nung sepaitemi state sorkar aser yimozülurtem jaoka jembi aser parnoki yimozülurtem nem ‘ban’ süa aliba telungpur telok indang kecha mezülutsü metetdakja aliba ken o ji agientsü lemtet. Iba senden nung state sorkar tsütsü nungi shinga arua madenba atema PCI-i mepelaba metetdaktsüogo.
“Assam Rifles o yimozülurtem na timi ajurutepa mener parnok tsüngda tangatettep kati arua, Assam Rifles purtemi parnoki yimozülurtem nem ken o agüja alibaji agientsü aser yimozülurtemia telungpurtem indang osangtsüsang züludang kümdanga zülutsü asoshi telemtetba tajung kati arutetba asoshi pelar,” ta PCI mendenbuba Justice C.K.Prasad-i metetdaktsü.

You must be logged in to post a comment Login