AR-i prangbong shibelener apu

Kohima, Monupii/May 20 (TYO): Kümtem tsüngda sentong balala yanglua itangitertem-i tarak meketi mapa inyakba sülen Dimapur kübok tesem kar nung ozüng alema bendanglen nungi prangbong shibelenba ngutetogo. Iba dak sendakba nung May 17 aser 18 nü Assam Rifles puri item shibelenertem aputsü atema Dimapur kübok tesem ishika meita aoba sentong ayongzüka kaogo aser iba mapang telungpur asem tashi puogo.
AR-i apuba telungpurtem ya Zunheboto District kübok Hemolim yimtsüng nung alir Lhoshiye Swu’er jabaso SS Maj Tonivi Swu (39), Tuensang District kübok Samator yimtsüng nung alir Shikyie’er jabaso SS Capt Hukuto Tokishe (42) aser Bank Colony, Dimapur nung alir Nivito’er jabaso SS Leacy Kiviho Kiva (50) ta jangjaogo.
Parnok ket nungi pistol asem, rifle ka, injang aser tashishi aketba kuli kaket balala nuteta liasü. Pua alirtem den külemi parnok ket nungi apuba osettem maneni bushitsüngdangtsü atema East Dimapur Police Station nung May 18 aonung bendanga agütsüogo.
Prangbong shibelenertem apuba ajanga state nung security tsütsü timtem bener arutsütsü merangba purtem nem tekümdangshitsüka agütsüogo, ta PRO(Defence), Col C Konwer-i sangdong ka ajanga metetdaktsü.