AR-i prangpong bena alir ka aser prangpong shibelener ana apu

Dimapur, November 01 (TYO): Prangpong bena aliba osang angazükba sülen HQ IGAR (North) kübok 32 Assam Rifles sepaitem den police senteper mita aodang October 30, 2017 nü Burma Camp, Dimapur nung nisung ka ket nungi Pt 22 mm Pistol ka den magazine aser tashishitsü aketba kaket kar angu, ta tanü Lt Col Amitabh Sharma PRO HQ IGAR (North)-i sangdong ka ajanga metetdaktsü.
Iba nisungbaji Kushiabil village, Dimapur nung alir arishi küm 45, Inache H Awomi lir aser maneni bushisüngdangtsü asoshi pa den pa ket nungi apubatemji East Police Station, Dimapur ket nung agütsüogo, ta sangdong nungsa shia lir.
Ano October 31, 2017 nüa 32 AR aser police-i mita aodang Super Market, Dimapur nung nisung ana ket nungi Pt 22 mm Pistol ana den magazines apu; tenaji Nagarjan, Dimapur nung alir arishi küm 55 Ayang Ao aser Christ colony, Dimapur nung alir arishi küm 46, Moa Jamir Ao na lir, ta Lt Col Amitabh Sharma-isa metetdaktsü.
Maneni bushisüngdangtsü atema pua alir ana den tena ket nungi apubatemji East Police Station, Dimapur ket nung agutsüogo, ta kasa sangdong nungsa shia lir.