AR-i prangpong-injang angu; NSCN(R) züngsem ka apu

Dimapur, December 14 (TYO) : Assam Rifles Field Intelligence Unit nung osang tejangja angazükba sülen 35 Assam Rifles-i December 11, 2016 nü Techa Colony, Mon nung ki ka mita reprangdang prangpong-injang aika ngutet, ta sangdong ka nung metetdaktsü.
NSCN(K) nung Col Tinka Konyak’er kidang nungi 7.62 mm AK 47 indang round 50, Motorola radio set ka, combat dresses, NSCN(K) indang tashiyim agi sen saruba shiditem aser tanga taitsü aketba kulikakettem angu, ta AR sangdong nung shia lir.
Ano, Longleng District nung NSCN (R)-i ozüng alema sen saruba aser tashiyim agi sen meshiba osang angazükba sülen December 11, 2016 nü 44 Assam Rifles-i Kanching yimtsüng nung mita ao, ta tanga AR sangdong ka nung ashi.
Iba mapang NSCN (R) züngsem ka apu aser paji Kilonser Chongpon Phom ta jangjaogo. Pa ket nungi pt 22 Pistol ka, magazines 2 aser rounds 73 den taitsü aketba kulikakettem angu aser pa Police Station, Tuli, Nagaland ket nung agütsüogo, ta Assam Rifles-isa metetdaktsü.