AR-i Zungti nung NSCN lenir ana apu

Dimapur, May 21 (TYO): Osang ka lazükba sülen May 19, 2017 nü HQ IGAR kübok 5 Assam Rifles sepaitemi Zungti Forest Area, Zunheboto nung NSCN atsükba tesem ka nguteta Sema Region Finance Incharge, Captain Mughato Sema aser Lotha Region Incharge, Major M Longthung Kikon na puogo; tenaprong NSCN nungi lir, ta tanü Assam Rifles sangdong ka nung metetdaktsü.
Tena ket nungi Hand Grenade ka, Nagaland Police Department indang taila identity card ka den trucks, yimdaklirtem aser mapa inyakertem dang nungi saru saruba kakettem den tashishitsü aketba kakettem apu, ta AR sangdong nungsa shia lir.
Captain Mughato Sema aser Major M Longthung Kikon nati Zunheboto district nung inyaker aser security sepaitem anema inyaktsü sentong asameyangba den nüburtem dang nungi ozüng alema sen saruba aser sen akhangba mapa nung densema lir, ta sangdong nungsa shia lir.
Maneni bushisüngdangtsü atema tena den tena ket nungi apubatemji Zunheboto Police Station ket nung agütsü, ta AR-isa metetdaktsü.