AR Rahman Cannes Film Fest nung shilem agitsü

Mumbai, May 13 (Agencies): Oscar ngur alisang kenmejema atener, A.R. Rahman-i 70buba Cannes Film Festival nung Sangamithra film director, producer tem aser tongti shilem agirtem den külmi ‘Red carpet’ nung shilem agitsü.
Cannes Film Festival ya May 17 nü nungi tenzüktsü aser iba sentong tetenzük anogo nung Rahman Red carpet nung jajaba angutsü.
“Ni Sangamithra nung shilem agiba atema kanga jangratema bilemer. Cannes nung film yangluba telok den longjemtsü asoshi yongyaa atar,” ta Cannes indang jembidang Rahman-i ashi.
Sangamithra ya Hindi, Tamil aser Telugu ta oshi asem nung mangaokba film ka lir aser iba film nung Shruti Haasan, Jayam Ravi aser Arya nungeri tongti shilem agir. Iba film ya Sundar C-i direct asü aser Thenandal Studios-i produce asü. Iba film nung Rahman music director lir.
“Iba film ya Thenandal Studios banner kübok ‘epic period film’ ka lir aser A.R. Rahman-i dena iba nung shilem agiba atema onok kanga nüma danga bilemer,” ta Thenandal Studios Chairman & Managing Director, Producer Narayanan Ramasamy-i ashi.
Iba film nung Production design, cinematography, stunts, costume aser VFX atema Sabu Cyril, Tirru, Peter Hein, Anju Modi aser RC Kamalakannan nunger anioka inyak.
Film yangluba telok ya Cannes nungi meyipa arur film pre-production atema maneni renemshiba maparen balala inyaktsü. Iba film ya August nung sayatsü imlar.