AR Rahman nem Hridaynath Mangeshkar Award agütsü

 

October 27, 2015: India nunger nüngtugu ken mejemer aser kentener A R Rahman nem Hridaynath Mangeshkar Award agütsüogo.

Lata Mangeshkar aser Asha Bhosle na teno Pandit Hridaynath Mangeshkar arishi küm 78 ajungba anogomung nung  Rahman nem  film yanglur tain Subhash Ghai-i 5buba Hridaynath Mangeshkar Award agüja liasü.

‘Hridaynath indang kentemji ajungmesobatem lir,” ta Rahman-i ashi.

Rahman-isa,  Mangeshkar’er kibongi putu ajak nung kentenba senmang amanger, ta ashi.

‘Taal’ film nung arishi küm 48 Rahman den külemi inyaksang Ghai-i, Rahman ji nüngtugu nisung ka dang masü saka nisung kanga tajung, ta ashi.

“Pai Hindi mesüra Punjabi memeteti liasü saka Taal film nung aonung 70 tashi inyakba ajanga ken mejemer tajungtiba rongnung pa lir ta kuli sayuogo,” ta Ghai-i ashi.

Iba sentong nung Hridaynath Mangeshkar-ia, Rahman-i kentenba maparen ajanga linük ajak tejak tentettsüsa inyakogo, ta ashi.

Award agütsüba sentong nung Grammy Award angur Hindustani classical musician Vishwa Mohan Bhatt aser 2014 Grammy angur Ricky Kej nata liasü.

Mezüngbuba Hridaynath Award ya Lata Mangeshkar nem agüja liasü.

Taoba mapaagtem nung  Asha Bhosle, Amitabh Bachchan aser actress tain Sulochana nungeria iba award nguogo.