ARA San Juan submarine küm 1 sülen nguogo

Buenos Aires, Yimpoksüi/November 17 (Agencies): Küm ka tejakdang samaba Argentina nunger navy submarine ka Rogonü Atlantic Ocean nung ngutetogo. Iba submarine nung crew 44 liasü.
Tzü telung nung meter 800 lur ARA San Juan aliba ngutetogo, ta navy-i Twitter ajanga sangdonga liasü.
US search firm Ocean Infinity pur indang rong, Seabed Constructor Rangjui/Sept nung tatemsa San Juan bushitsü asoshi apuso aser parnoki iba submarine nguteta liasü.
2017 küm Yimpoksüi/Nov 15 nü Argentina tzüküm nungi km450 shi pilar iba submarine den tesendaktep samaatok. Iba submarine ya Ushuaia nungi parnok indang base-i oya aliba mapang nung sama.
San Juan nung mena alir shinga mekümzük ta sorkari sangdongaka, sailor rongnung ka tebu Luis Niz-i, parnok taküm alitsü ta imlaba lemsatep.
Iba tatalokba dak sendakba nung navy kanga mejungi aitsüogo. Iba lendong atalokba sülen anogo ishika lir külenang navy ketdangsertemi iba submarine nung battery tebilemtsü aliba metetdakja liasü.
Iba sülen anogo 10 shi lir navy-i iba submarine nung langka poka liasü ta metetdaktsü, koba mongintemi ashiba agi battery mejungi aliba dak sendaka alitsü.
Iba submarine bushiba nung linük 13 nungi unit balala adenshi saka parnok timbaka 2017 tatem nung toktsüadok.