Arab League-i Hezbollah kiralongrar telok ama züngoktsü lemteter

Cairo, March 12 (Agencies): Arab League (AL) tenteti Lebanon nung tentetba Hezbollah telok kiralongrar telok ta züngoktsü telemtetba ka yashi, Hokolbar nü agiogo.
Middle East nung tentetba linük 22 nungi foreign minister-temi yashi Cairo nung senden ka amendang Hezbollah telok kiralongrar telok ta züngoktsü telemtetbaji agia liasü.
Ajisüaka, Lebanon aser Iraq nati Hezbollah kiralongrar telok ta züngoktsü onük magizüktsü temulungtetba yua liasü aser ibaji ajanga Shi’ite nisung timba alidak, Iran aser Sunni kin timba aliba Gulf Cooperation Council (GCC) na tsüngda tesendaktep mejungi akümbaren alima dang jungkai adokdaka sayuogo.
Saudi Arabia sorkari Lebanon sorkar nem dollar sen billion 4 densemba mitkar teyari magütsütsü telemtetba agir hopta 2 mabensadang AL-i Hezbollah kiralongrar telok ama züngoktsü telemtetba ya agir lir.
GCC tentetia Hezbollah kiralongrar telok ta züngoktsü telemtetba tan March ita tetenzüklen agiba osang jangjaogo.
“Hezbollah teloki GCC nung züngsemba linüktem nungi lanurtem par telok nung anioka parnok kiralongradaktsütsü, tongpang osettsüset ozüng alema shibelendaktsütsü aser lendongtsüdong balala atalokdaktsütsü merangba nokdangtsü nükjidong nung GCC-i Hezbollah kiralongrar telok ta züngoktsü lemtetogo,” ta GCC Secretary General, Abdullatif al-Zayani-i metetdakja liasü.
GCC nung Saudi Arabia, Kuwait, Qatar, Bahrain, Oman aser United Arab Emirates nunger züngsema lir.
US sorkaria mapang talang ka nungi tenzüka Hezbollah kiralongrar telok ta züngshia arur aser European Union (EU)-ia 2013 küm nungi tenzüka Hezbollah kiralongrar telok ta züngoktsü tenzükogo.