Arangtet Tatidang agütsütsüpur atema jangjashiyim sentong ka agi

Mokokchung, Sept 30 (TYO): Ao Senden Literature Board-i ayongzüka 2017 küm Arangtet Tatidang agütsütsüpur atema jili jangjashiyim sentong ka yangi Jubilee Memorial School Mokokchung nung agiogo. Iba sentong nung Artangtet Tatidang agütsütsüpur parnok 160 shi adenshia Ao oshi dak sentakba onük balala nung shisatokdena mungogo.
Tanü iba sentong nung Ao Senden tir Wb. I. Imliyanger Jamiri jembidang, oshi ya Tsüngremi moatsüba ka lir. Nisung o shiruru na bendangbaji oshi ajanga dang lir aser oshi yagi telungjem adokdaktsür aser oshi yagi telemsa bener arutsür, ta kuli kar dena ashi.
Tanü alima nung oshi 5000 shi lir, item rongnung meilongi oshi aika samaa odaki, anungji, Ao oshijia koba tia nung lir, ta paisa tekümdangtsü o ka ashi.
Alima temeyoktep sobaliba ka nung alidang, ASLB-i Ao oshi wazüka aser süsümedemtsü asoshi maparen balala inyaka ya tashi tongtetba asoshi pelaba den ano teinyaktsü wadang aika alinung, meranga inyaktsü aser iba nungji nüburtemi Ao oshioben tejakleni aotsü asoshi amalitepa aser nungita yariteptsü tayongzükba ka agütsü.
Sentong nung Fazl Ali College nung tesayur Dr. Lanurenlai ‘tanü putu aser tetsü oshi’ dak ajemdaker tensa den apet bendanger oshi balala den medemdanga onük tajung aika bener arua lemsatep. Watsü Mungdang tir Wt. Maonginlaia mapang tatsüka agia ‘tetsü oshi aser watsülar’ onük nung tebilemba kar lemsatepa liasü. ASLB tezülur Temjen Tzüdir-i ‘arangtet tatidang aser zülumen Jangjashiyim’ dak sentakba nung ozülu terata nung aliba aika lirumedema zülutsü jangjashitsü.
Kasa sentong ya Dimapur nunga October 2 nü anepdang 10:00 ako nungi tenzüka MHrSS nung ayongzüka lir, anungji, AT agütsütsüpur ajak khangtepa arua adentsü asoshi ASLB ketdangsürtemi metetdaktsüogo.