Arasentsür 5 tepsetba ken o nung nisung 27 puogo

Ranchi August 09 (Agencies): Jharkhand, Ranchi district nung arasenba mapa inyakertem ta temelung melemi tetsür pongu tepsetba ken o nung tajemba agi nisung 27 puogo, ta tanü Jharkhand Police-i ashi.
“Tetsür pongu tepsetba ken o nung tang tashi nung nisung 27 puogo. Ano tali aputsü,” ta police ketdangser kati ashi.
Arasenba mapa benshirtem ta melung melemi tepsetba ya state nung kanga buloa kümdagi aser iba dak sentakba tebilemtsü nung o lemteptsü atema Chief Secretary Rajiv Gauba-i high-level senden ka ayongzüka lir.
Honibar nü Ranchi district kübok Kanjia yimtsüng nung alirtemi arasenba mapa inyakertem, ta melung melemi tetsür pongu tepseta liasü.
2013 küm Jharkhand nung nisung tepsetba ken o 160 nungi ken o 54 bo arasentsürtem ta aija tepsetba ken o liasü aser 2001 küm nungi tenzüka tanü tashi nung state nung arasentsürtem ta melung melemi tetsür 400 shi tepsetogo.
Jharkhand Chief Minister Raghubar Das-i iba tatalokba aija, “Tangatetba shisatsü aliba putu ka nung, iba tatalokba ya tejashitsüka lir. Lokti-i iba ya junga shisadangtsüla,” ta shiogo.