Archaeologists temi Galil tzüyim anasa Church of the Apostles ngutet

Jerusalem, Luroi/August 01 (Agencies): America aser Israel nunger archaeologist temi Galil tzüyim anasa Church of the Apostles ngutet. Iba tekülem ki ya Yisu nütsüng Peter aser Andria na ki anasa yanglu ta amanger aser iba ajanga Bethsaida yimti aliba tesem sayur, kong Yisu-i nükpoker ka jungdaktsü.
Israel nung aliba Kinneret College nungi archaeological team ka aser Nyack College indang Center of the Study of Ancient Judaism and Christian Origins ajanga taoba mapang Galil tzüyim north tsütsü tzükümlen el-Araj nung ali toa bushiba mapang marble aser gilded glass blocks tila, koba dang ‘tesserae’ ta ajar, item osettem nguteta liasü. “Item osettem ngutetba ajanga anasa tenlaki ngutettsü ataa liasü ta ashir,” ta Nyack College nungi Prof. Steven Notley-i Fox News dang ashi.
Iba telok yagi iba sülen tekülem ki indang atem ngutet, koba ali telung nung küm 1,500 jungnüa rema liasü. Item osettem ngutetba yagi tekülem ki tuluka aliba sayur, ta Center of the Study of Ancient Judaism and Christian Origins ajanga sangdong ka nung shia lir.
Akhi indang otsü nung Church of the Apostles keta lir, aser Bavarian bishop Willibald-ia 725 AD nung iba indang zülua liasü. “Willibald-i ashiba agi, Bethsaida nung iba tekülem ki ya Peter aser Andria nunger ki kolaklen yanglu, shirnok Yisu nütsüng mezüngpur liasü,” ta Notley-i ashi.
Item osettem ngutetba yagi tekülem ki aliba kuli sayuba kisüng masü saka Bethsaida aliba tesem jangjateter. “…tesü tashi scholar aikati iba tenlaki aliba indang temulungjang nung tasüngdangba arua liasü. Iba tenlaki indang ya Byzantine temeshi ain-i aoertem indang kaket nunga shia liasü, saka aikati item osang ya aibelenba südi ta bilema liasü,” ta Notley-isa ashi.
“Item ajak ya tongtibang lir, aser iba tenlaki ajanga Khristanpur mulungjang nung Bethsaida tesem teti alir, kong Peter, Andria aser Filip nunger liasü (Yohan 1:44).”
4buba aser 5buba century AD mapang iba tesem nung shinga mali amai sayu, saka tawa Roman nunger tzü akoba, Roman mapang yangluba ki aser chipo-aunpo ngutetba ajanga yangi yimti tilaka liasü ta sayur.
Iba team yagi tekülem ki ajunga ngutettsü teimla nung maneni taruba season nunga el-Araj nung ali toa bushitsü. “Tang tashinung onoki tekülem ki south tsütsü takdang tem kar nguteta lir. Iba season tatembangi onoki tenlaki tiyong indang atem mesükba ngutet,” ta Notley-i ashi.
“Taruba season tatemi onoki mezüng season pongu nungi ngutetba osangtem kaket nung adoktsütsü imlar aser Tasen Lai Bethsaida-Julias indang tasüngdangba langzütettsü,” ta paisa ashi.