Archbishop-i Nigeria nung rishikangshi mapa anentsü mepishir

January 13 (Agencies) : Nigeria nung Khristan pur rishikangshiba mapa anentsü asoshi linük nung Catholic Bishop tekolakbai temepishiba ka agütsüogo.
Taoba hopta Kaduna state nung Fulani Herdsmen telungpuri nisung tenet tepsetba sülen Archbisop Ignatius Kaigama-i iba temepishiba agüja liasü.
Herdsmen telok yagi iba tesem nung Khristan tem indang yim aika amanglema lir aser parnok Boko Haram den tanaben lungjemtsü sentong renemdar, ta osangbenertemi ashi.
Telungpuri yaküm item yimtsüngtem amakba mapang nungi tang tashi nung yimtsüng nung aliba Khristan pur nisung 800 dak tema tepsetogo aser sen million dollar 17.5 alang teraksa adokdaktsüogo, ta State nung Kafanchan kübok aliba Roman Catholic Arogoi asadangteta lir.
Iba arogo sangdong ajanga ashiba agi, 2016 küm telungpuri yim 53 amakba mapang ki 1,400 dak tema, tenla ki 16, skol ka aser gari pungu raksatsüogo.
“Asenok shi tejangraba onsara tali akümba ajanga iba ama tashiyim aser rishi kangshi mapa inyaker aser ibaji ajanga lokti-i ozüng metsübur, mangatettep aser rara adoker, ozüng samadaktsür aser tetsübu adokba den atakatem bena arur. Boko Karam telok kijai tepsetba agi tenük masünger asü koda,” ta Archbishop Kaigama-i ashi.
“Tang Kaduna anüolentip aser linük tesem balala nung tensa mejungi aliba tesemtem nung kecha tashi aser tai maliba Nigeria nungertem den rarar,” ta pai shisem.
Archbishop-i, lanurtemi tangar takümji kanga pungba agir aser mashi mapang samatsür, ta tekümdangtsü ashi.
“Kodang nungi Nigeria nunger taküm kaji meimchir rongnung züngoktsü, mesüra kanga mejungi akoksaba sülen ang asenoki aibelenba shisadangtsü,” ta Kaigama-i asüngdang.