Archery World Cup: Deepika Kumari-i otsü tasen yanglur

Shanghai, April 27 (Agencies): India’er tetsür lasang toktepa kashishir, Deepika Kumari-i tang China kübok Shanghai nung tasayadak Archery World Cup tetsür recurve tetoktepba nung otsü tasen yanglua tanü, Bodbar nü shilem agiogo.
Tesüiba tetsür World No.1 aser Commonwealth Games gold medal 2 ben tashi agizükla, Deepika-i 72-arrow ranking round nung points 686 tashi anguba sülen Korea tsür, Ki Bo Bae-i yangluba world record  menepa otsü tasen yanglu.
London Olympics gold medallist, Bae-i yaküm Gwangju nung asayaba qualification asayamong nung points 686 ngua külem sensotsür, Park Sung-Hyun-i küm 11 tejaklen yangluba points 682 anguba otsü ajangteta liasü.
Tan asayamong nung temaba jenjang abenla, Deepika-i maneni Round 3 asayatsü jenjang nguogo saka külem sensotür, Laxmirani Majhi aser Rimil Buriuly nati maneni Round 1 nungi asayashitsü jenjang angu.
Tan asayamaong nung India’er tetsür teloki 4 buba jenjang ngua lir.
Deepika-i külem sensopur, Atanu Das den aroki lungjemer points 671 ngua Turkey madak points 5-3 agi mixed double tetoktepba 1 buba round asaya akokba osanga jangjaogo.
Tenati points 3-5 ngua semifinal asaya nung Chinese Taipei telok mekoktet saka tenati Korea telok den bronze medal agizüktsü asoshi toktepa asayatsü jenang ngua lir.
Denmark yimtiba, Copenhagen nung yaküm ayongba World Championships kübok individual aser team tetoktepba nung takok ngua shilem agiba sülen Deepika-i taküm Brazil kübok Rio de Janeiro nung asayatsü ayongba 2016 Olympics nung India tenüng nung toktepa shilem agitsü jenjang ngua lir.