‘Archie’ cartoon yanglusang, Tom Moore süogo

El Paso, July 22 (Agencies): “Archie” cartoon yanglusang Tom Moore, shibai tejak nung ‘freckles’ aser kou temerem aketba asangur Archie noksa yanglua liasü pa Texas nung par jila, El Paso nung arishi küm 86 nung alima nungi pilaogo.
Korean War mapang Moore US navy nung alidang nungi pai noksa/cartoon yanglua liasü, aser pa Hombar anepdang (July 20, 2015) züngia El Paso nung aliba mozüki ka nung süogo, ta par jabaso Lito Bujanda Moore-i Mongolbar nü The Associated Press dang metetdaktsü.
Pai ashiba agi, tebu dak terok cancer putet saka pai treatment agitsü memelungi liasü.
Moore-i 1953 küm nungi tenzüka 1980s mapang tashi Archie Andrews aser par medemertem noksa yanglua liasü.
1960s mapang nung küm shia Archie comics nung sen million tesadsang ka yokzüka liasü, ta El Paso Times ajanga ashi.
“Ni ita shia comic kaket ka yanglu,” ta 1996 küm Moore-i osangbenertem dang ashi.
“Ajakji ni inyak. Onoki ita trok jelia inyak. Christmas issue atema ni June ita nung inyak,” ta paisa ashi.
Korean rara sülen Moore-i GI Bill nungi anguba sen ajanga New York nung cartoonist school ka nung azüng. Pai “Tarzan” comic strip illustrator Burne Hogarth nungi tangazükba ngua liasü.
Iba sülen pai New York nung Archie Comics den tezüngzüktep yanglu. Bob Montana-i 1941 küm “Archie” tenzüka liasü aser 1953 küm Moore-i pa melenzük.
Par jabaso Bujanda-Moore-i ashiba agi, tebu-i süngdong, ayong, tenem aser lisem lima kanga meima liasü.