Arem ozütem amongi arur

Taküm 2016 küm asenok ajak asoshi tepelatsü osang kaji Jangpetkong nung tenem ozü trok arua amongba osang ya asütsü. Tenem ozü trokji tetsü asem den tebong asem asütsü, kechiyong parnokji tedongtechi mesüra apuani na külem-külemi dang senzür. Asenok Aortem asoshi balaka tenem ozü ya tetezü aketba ozü lir. Aji oda, asenok nisung sür lepku anogo pongo mesüra trok amongba yaa akhidang tsürabur mapang tenem ozü pei apuani sür mangyima amongba nungi angazük ta jembir. Ibaji dang masü saka tenem ozü ya ozütem ajak madak temaba anungji tenem züng dena asenoki kanga sentisa amshir. Iba ama topur ajungba dang masü saka tetezü aketba ozü asen lima nung mali küma samadaktsübaji asenok asoshi takoksa tuluka liasü. Akhi tsürabur mapang prangpong maka dang aser lijak yanglua amshi mangazükdangbo asen lima nung ozü tapu aika liasü. Item ozütemi tsüngküm mongpu metetdakja ken atenba agi alima lemsadaktsü. Ajisüaka, kodang asenoki prongpong aser lijak amshia ozü tulu tila khaseta achitsü tenzük, metetmeteta asen lima nung ozü mali aküm. Ano, asenoki khasetba dang masü saka arema mein ajak lepdoka asenoki rongsen bushiba agi ozütem talidak maka jena oma. Ibayongji, tanübo asen lima nung pentsü ozü olaa mangshii kümogo. Asenok taoba küm ishika tsüngda azüngtsü aser zülutsü metetter külen alu tajungba ayim masü saka alu mayim ser ita sen chia kazütsü tangatetba ka aruba ajanga arem wazüka meyutetba den ano akhidang asenoki amshia aruba tsük metsü dena samadaktsüogo. Atangji, tanü asenok yimtsüng aika nung tsük mamshir, anungji tanü asüng tanurtemibo jang anguba dak alaka tsükbo mangu aser memetetba purtem aika lir. Iba kasaji tsürabur mapang aliba ozütem aika tanübo olaa mangashir, anungji tenem ozü ama ozü tulutemjibo yutsür pentsü ozü olaa mangashir asünungji tanü asüng tanurtemibo pentsü ozü lir mesüra liasü ta memetettsü. Ano, tesüngmangtsü kaji asenoki waro shibo machir, anungji mekhaseter ser nung asen lima nungbo waroa mali kümogo. Arem shiruru aser ozüsangnü mali asünungji, alima agi alima memesük telinütsüa maket, azüngazünga küma asenoki litetbaji tesasatsüka lir. Asenok tashitemetetba kümli, chidiyongdi aser morumoru tasüba kümli ta akümba agi alima agi matir, anungji mainer. Atangji, alima nung akaba ajak ya Tsüngremi asenok nem moatsüba temoatsütem lir, anungji asenok meyong. Ajisüaka, itemji Tsüngremi asenok nem samatsütsü asoshi masü saka anepalua ketdangsütsü asoshi agütsüba temoatsütem lir. Ibaji angateta asenoki arem nung aser ayong nung aliba shiruru mesamadaktsüi asenok nüngdak yari agir toktsüra teti asen nüngdak peribo alima nung ango aser arem shirurutemji alitsü. Atangji, yashi tashi asenoki asenoksasa tangatetter amai bilema liaka, asenoki mapa aika mangateti inyaka lir ta tangang jangjar. Yashi tashi asenok aika asoshi aremi prangpong bener aoba mesüra ayongi bomb aser mozü bener aobaji jangratemtsü mapa ka liasü. Ajisüaka, asenoki ayong nung bomb apokba aser mozü amshiba agi ango tulu dang masü saka ango tila aser entsü dena samadaktsür ta tanüang angatetter. Iba kasaji arem mein samadaktsüba agi tzü mopong majung kümdaktsüba dang masü saka arem shiruru aser ozüsangnu dena samadaktsür ta tanüang asenoki tajungba angatetter. Atangji, tanübo asen lima ayong aika nung akong dena mali kümogo aser arema tazüng kümogo. Ajisüaka, akhi ama ayong aser arem shia arudaktsütsübaji takoktsü aser tang ya mapang tajung ka asütsü. Joko tangbo asenok aikati süngdong atemer aser arem wazüka ayur. Ibaji dang masü saka shiruru khaseta achitsü nokdanger aser ozü sangnu asen lima nung arua mongdaktsütsü asoshi timtem magütsütsü yimten ozüng agüja sangdonger. Item ajakji angateta asenoki asen lima ya Tsüngremi yangluba lima ta angateta yanglura, atangji asen lima agi asenoki kotak küma yanglutettsü.