Argentina nung jana achiba robot ka yangluogo

Buenos Aires, March 4 (Agencies): Argentine nunger engineer kati ‘recycled’ asüba osettem ajanga robot tasen ka yanglutetogo, ta Hokolbarnü osangbenertemi metetdaktsü.
Iba robot nem Nano ta tenüng agütsüogo aser iba ya electronic oset joko tamshi majung kümer entokbatem agi yangluba lir, ta Xinhua news agency ajanga metetdaktsü.
Nano yagi pa achitsü oset angudangdang tebang akatsü, ta iba robot yanglusang Pablo Romanos-i ashi.
Nano dak aliba ‘sensor’ temji jana bendena oset tamajung agi tajung küma yanglurtem ket nung aliba ‘Xbox console’ ka agi yangluba lir, ta electrical engineer aser University of the Merchant Marine nung Professor Romanos-i ashi.
Iba sensor ji ajanga robot jagi ozüng agütsüba angateter. Iba ya tanurtemi games asayadang amshiba oset mesüka lir,” ta Romanos-i ashi. Nano dak speaker enokja lir aser memonoi computer screen-a enoktsütsü.
Iba robot rangben ya ‘recycled’ osettem ajanga dang yangluba lir, aser ibaji ajanga tangar danga jana ajiteta itemji tanaben oset yangluba nung amshitsü tetuyuba agütsür, ta osang ka ajanga ashi.
“Lenmang nung jana entokba pongdang sentsü balala yuja aliba asenoki teti angur, ajisüaka koba nung komala jana entoktsü’ar asenoki memetet anungji robot ajanga asenok dang iba nung tesayuba agütsütsü,” ta Romanos-i ashi.
Iba amala robot ya school tem nunga alinung ajungtsü, kechiba süra tanurtemi aginüba yimya nung iba robot yagi jana agi tagitsü küma recycle asüba inyakyim sayutsü, ta pai ashi.
Pai iba robot yangludang printer indang oset kar den architect ka, specialised mechanic ka aser pai sayuba kaketshirtem kar teyari agia yanglu.