Rio de Janeiro, February 11 (Agencies) : Atletico Mineiro telok nungi Argentina nunger striker Lucas Pratto, Brazil nunger football club Sao Paulo nungi küm pezü asayatsü asoshi contract yangluogo.
Hokolbarnü Sao Paulo-i Mineiro nem arishi küm 28 tain, Pratto indang transfer fee agütsütsü mulungtepba sülen Deobarnü club sapurtem den pa metetpeladaktsütsü sentong renema lir, ta osangbenertemi ashi.
“Continent nung forward nung asayar tajungtiba rongnung ka onok den denogo. Pa Argentina nungi aser taruba world cup nung tongtiba asayar ka asütsü,” ta Sao Paulo Tir Carlos Silva-i ashi.
“Onok kanga pelar aser temulung asür. Ibai onok asoshi tongtibang investment ka lir aser iba ya asoshi onoki sentong atonger liasü. Iba sentong ya ‘financial recovery programme’ ajanga takok ngua inyaktet,” ta pai ashi.
Pratto Velez Sarsfield nungi Atletico Mineiro nung arua dener asaya 104 ben asayaba nung goal 41 yoka lir. Ano pai Argentina asoshi pezüben asayaba nung goal ana yoka lir.
Pai, “Sao Paulo ama club tulu kati aittetba atema ni kanga pelar. Ni goal aika yoka iba telok nem takok bener arutsütsü imlar,” ta ashi.
You must be logged in to post a comment Login