Argentina: Police bus gari ka tsükok; 41 shi tsükset

Buenos Aires, December 14 (Agencies): Argentina anüdoklentip tsütsülen, Salta province nung police bus gari ka tanep, Hombar anepdang tsükoka lendong atalokba osang ka Argentina sorkar ketdangsertemi metetdaktsüogo.
Bus gari 3 densemba police gari convoy kati Buenos Aires yimtiba nungi anüdoklentip tsütsüleni mile 932 shi pilar Salta yimti anasa apu ka ajangdangdang bus gari anishir kati pai aniba gari mazüoktetti bus-ji lenkübokleni feet 65 shi lua tsükoka lendongji atalok ta parnoki ashi.
“Tanü lendong ajuruba bus-i border patrol police züngsem 60 shi anir liasü aser tang tashi nung parnok nisung 41 tashi tsüksetba osang jangjaogo,” ta Salta provincial emergency director, Ernesto Flores-i osang jangjashitsü.
Paisa ashiba agi, tan lendong nung yirurtemji anasa tentetba mozüki tonga anir orr tang anepalutsü tenzüka lir.
“Tan lendong atalokdak lenmang kanga mejungi lir,” ta shia, tanü lendongji mechanical timtem kar adoka atalok südi ta lendong atalokdak anasa tentetba Rosario de la Frontera yimti nung mayor, Gustavo Solis-ia temulung malemba olen ka metetdaktsü.
Argentina Tir, Mauricio Macri-ia tanü lendong atalokba atema sasa bilemba olen ka metetdaktsüogo.