Argentina tsürtemi 7 buba Champions Trophy takok marok agizük

London, June 27 (Agencies): Argentina’er tetsür hockey teloki otsüsütsüsa 7 buba Champions Trophy takok marok yashi, Deobar nü agizükogo.
Argentina tsürtemi goal 2-1 agi World aser Olympic champions, Netherlands tsür madak final asaya koka takok marokji agizüka liasü.
Yashi asaya mezüngbuba quarter nung Martina Cavallero aser Noel Barrrionuevo nati goal kaka agütsüba ajanga par Argentina teloki temaba jenjang ngua asaya.
Netherlands tsür, Eva de Goede-ia asaya tanabuba shilem tetenzüklen lar Netherlands telok asoshi goal 1 agüja lar telok jenjang tajungba kümdaktsü.
Ajisüaka, tanüngba asaya mapang nung Netherlands teloki goal meyiptsütetba yong Argentina teloki goal 2-1 agi Netherlands telok madak takok nguadok.
“Ozü teloki bilemba ama junga masayatet saka final asaya akokba atema kanga pelar,” ta tan asayamong nung goal 7 tashi agütsüba nüngtem nung Top Scorer aser Best Player sempet agizükla, Argentina captain, Carla Rebecchi-i tesülen metetdaktsü.
Rebecchi den külemi, Netherlands goal keeper, Joyce Sombroek-i Best Goalkeeper aser Argentina asayar, arishi küm 21 tain, Mario Granatta-i Best Junior Player sempet agizüka liasü.
Ano külen, 3 buba jenjang ajangzüktsü asaya nung US tsürtemi penalty asayaba sülen Australia telok madak takok ngua, bronze medal agizükba osanga jangjaogo.