Argentina’er rongsenren jenjang tajungba kümdaktsütsü: Macri

Argentina Tir election nung takok ngua Argentina Tir tasenba akümtsü jenjang anguba sülen Argentina nung tentetba teloktep yimtenren telok, Cambiemos nungi Tir election nung candidate ka ama toktepa shilem agisang, Mauricio Macri-i jala, Antonia pa tapubang nung mendaktsür pa pusemertem den Buenos Aires yimti nung külemi pelatepba noksa nung angur. (Buenos Aires, November 23)

Buenos Aires, November 23 (Agencies): Argentina linük indang rongsenren jenjang tajungba kümdaktsütsü tenangzükba olen ka Argentina Tir tasenba akümtsü jenjang tajung angusang, Maurico Macri-i tanü Hombar nü metetdaktsüogo.
Opposition lenisang, Macri-i Tir election nung takok anguba sülen taoba Argentina Tir, Cristina Fernanadez de Kirchner melenzüka Argentina Tir tasenba akümtsü jenjang yashi Deobar nü ajangzük.
Latin America nung densemba linük tulu tarensen nung tasembuba jenjang nung aliba linük, Argentina indang rongsenren jenjang kanga mejungi aliba mapang ka nung Macri-i tan Tir menden abentsü jenjang ya angur lir.
“Taoba Tir, Cristina-i aniba leftist sorkari aibelenbaren ajunga metongshija asen linük indang rongsenren jenjang tajungba kümdaktsütsü nangzüker. Anungji, iba temelenshi tajung bener arutsüba jakdang nüburtemi aremzüka sorkar tasenba den amaliteptsü ajungshir,” ta Macri-i tanü sangoktsü.
Ano, “Küm 4 tejaklen nungi tenzüka Argentina nung terenlok melii aruogo,” ta shia, sorkari temulung alemba ketdangser tasen atema len lapokja Argentina central bank Tir, Alejandro Vanoli aser pai aniba bank ketdangser ajungai pei mapa toktsütsü tetuyuba ka Marci-i tanü metetdaktsü.
“Taoba Argentina Tir, Cristina-i tenzükba mapatong ajunga tajungba küma melenshitsüba ajanga sorkar tasenbai Argentina nung nungdakba terenelok bener arutsütsü alizüng tulu lir,” ta Marci-isa shisem.