Aria bilemba temeim

“Aser Pa adokdang nisung telok tulu ka angu, aser Yisui parnok asoshi aria bilema, parnok shirangertem aneptsü.” Mathi 14:14

Aria bilemba temeim ya tangar timtemba reprangteta ji agientsütsü apusodaktsüba temeim dang ajar. Timtema alirtem asoshi temeimji mapa agi sayutetba dang ajar. Meima bilemba dang masü saka temeimji mapa akümbaji tongtipang. Asenji tangar tia kasa nungji ali asübo koda süla ta bilemer külen, aseni parnokji meyari tashi tesünep mangubaji Aria bilemba temeimji lir. Kodang Yisui telokti anasaji nokdak Pai parnok taküm otsü, tia aser timtem ajak ateta angu aser iba jagi Pa temulung raksa, Pai aria bilem aser Pai temulung ajak agi yarinüa ait. Yamaji Pai parnok aneptsü. Yisui yamaji mangyima alirtem, zütsüra keter alirtem, makamaitertem, amitsürtem, tsürabur malirtem, temenen tanela agi pur alirtem aser iba mesükba tia tamajung balala nung alirtem ngua Pa temulung raksa.

Tanüa asenok iba amala tia nung alirtem ajak ngua Pai yariner, aneptsüner, asen timtem nungi anitetner. Arungma Pa anasa odi.

Sarasadem
Onok onsara temoatsüba kechiyong onok asoshi aria bilema meimba Yisu, nai ozü timtem aser nüngdak ajak angur. Ne nem tenüngsang agütsür. Amen